મહેસાણાઃ જિલ્લામાં ચાલુ ચોમાસુ સીઝનમાં 4.63 લાખ હેક્ટરમાં વાવેતર થવાનો અંદાજ છે. તેની સામે પ્રથમ 2 અઠવાડિયામાં 15 હજાર હેક્ટર વાવેતર થઇ ચૂક્યું છે. જિલ્લામાં સામાન્ય રીતે 30 જૂનથી 15 જુલાઇ સુધીમાં સરેરાશ 3 ઈંચ સુધીનો વરસાદ થતો હોય છે. જે ચાલુ સાલે 15 જૂન સુધીના પ્રિ-મોનસૂનના સમયમાં જ થઇ ગયો છે. જેથી જિલ્લાના ખેડૂતોએ વરાપ નિકળતાં વાવણી કરવાની શરૂ કરી છે.
મહેસાણા જિલ્લામાં અત્યાર સુધીમાં કપાસનું 9,000, ઘાસચારાનું 4,100, શાકભાજીનું 1,025 અને મગફળીનું 979 હેક્ટર મળી કુલ 15,122 હેક્ટરમાં વાવેતર થઇ ચૂક્યું છે, પરંતુ ગત 1 અઠવાડિયાથી વરસાદી માહોલના કારણે વાવેતરની બ્રેક લાગી છે.
જિલ્લામાં 15 જૂન સુધીમાં સરેરાશ 3 ઈંચથી વધુ વરસાદ થઇ ચૂક્યો છે. જે ચોમાસુ પાકોની વાવણી માટે યોગ્ય છે. ચાલુ વર્ષે પ્રિ-મોનસૂનમાં જ વાવણી લાયક વરસાદ થતાં, ખેડૂતોએ ગત 5 વર્ષ કરતાં વહેલી વાવણી શરૂ કરી દીધી છે.
આ અંગે ખેડૂતોએ જણાવ્યું હતું કે, હવે વરાપ નીકળવાની રાહ જોવાઇ રહી છે. વરાપ નીકળતાની સાથે જ વાવેતર ઝડપી બનશે અને દર વર્ષ કરતાં 15 દિવસ પહેલાં વાવણી પૂર્ણ થશે. જેનો ફાયદો શિયાળુ સીઝનમાં પણ થશે.
ગત 5 વર્ષમાં વાવણી લાયક વરસાદ
| તારીખ | વરસાદ |
| 30 જૂન, 2015 | 73 મિ.મી |
| 15 જુલાઇ, 2016 | 70 મિ.મી |
| 30 જૂન, 2017 | 96 મિ.મી |
| 15 જુલાઇ, 2018 | 73 મિ.મી |
| 30 જૂન, 2019 | 79 મિ.મી |
