કડીના કસ્બામાં મકાન ધરાશાયી, ભાઈ-બહેન દટાયા, ભાઈનું મોત, બહેન સારવાર હેઠળ

મહેસાણાના કડીના કસ્બા વિસ્તારમાં કાળી શેરીમાં રહેતા મુન્નાભાઈ ઘાંચીનું ઘર ભારે વરસાદને કારણે ધ્વસ્ત થઈ જતા મકાનના કાટમાળ નીચે તેમના બે સંતાન દટાઇ ગયાં હતાં. જેથી સ્થાનિકોની મદદથી મકાનનો કાટમાળ દૂર કરી બહાર કાઢી સારવાર અર્થે હોસ્પિટલ ખસેડવામાં આવ્યાં હતાં.

મહેસાણા: કડીમાં બારેમેઘ ખાંગા થતા જળ બંબાકાર જેવી સ્થિતિ સર્જાઈ હતી. શહેરમાં 6 કલાકમાં 10 ઇંચ વરસાદ ખાબકતા ઠેર-ઠેર પાણી જ પાણી જોવા મળ્યાં હતાં. બીજી તરફ શહેરના કસ્બા વિસ્તારમાં કાળી શેરીમાં રહેતા મુન્નાભાઈ ઘાંચીનું ઘર ભારે વરસાદને કારણે ધ્વસ્ત થઈ જતા મકાનના કાટમાળ નીચે તેમના બે સંતાન 6 વર્ષની દીકરી આઈશા અને 8 વર્ષનો દીકરો નૂર દટાઇ ગયા હતાં.

જેમને સ્થાનિકોની મદદથી મકાનનો કાટમાળ દૂર કરી બહાર કાઢી સારવાર અર્થે હોસ્પિટલ ખસેડવામાં આવ્યા હતાં. જો કે, મકાન પડતા ગંભીર રીતે ઘાયલ થયેલ 8 વર્ષના નૂર મહમદનું મોત નીપજ્યું હતું.