લૂણાવાડાઃ કોરોનાની મહામારીમાં મહીસાગર જિલ્લાના નાગરિકોને કોરોના વાઇરસના સંક્રમણથી સુરક્ષિત રાખવા અને રોગપ્રતિકારક શક્તિમાં વધારો થાય તે માટે જિલ્લા-તાલુકા અને ગ્રામ્ય સ્તર સુધીના આરોગ્યકર્મીઓ સતત અવિરત પણે પોતાની ફરજો અદા કરી રહ્યાં છે. આરોગ્યકર્મીઓ ગામેગામ ફરીને ડોર ટુ ડોર સર્વેલન્સની સાથે આરોગ્યલક્ષી શિક્ષણ આપી રહ્યાં છે. જેના ભાગરૂપે લૂણાવાડા અર્બન હેલ્થ સેન્ટરના આયુષ મેડિકલ ઓફિસર અને આરોગ્યકર્મીઓ દ્વારા લૂણાવાડા શહેરમાં હોમ આઇસોલેટ કરવામાં આવેલા 26 કોરોના દર્દીઓની તેમના ઘેર જઈને મુલાકાત લીધી હતી.
આરોગ્યકર્મીઓએ તેઓની મુલાકાત દરમિયાન તમામ દર્દીઓનું થર્મલ સ્ક્રિનિંગ અને SPO2ની તપાસણી કરી જરૂરી માર્ગદર્શન આપ્યું હતું. આ મુલાકાત દરમિયાન તમામને જરૂરી આરોગ્યલક્ષી સૂચનાઓ આપી કામ સિવાય ઘરની બહાર ન નીકળવા તેમજ ફરજિયાત માસ્કનો ઉપયોગ કરવા, વારંવાર સાબુથી હાથ ધોવા અને સોશિયલ ડિસ્ટન્સનું પાલન કરવા સમજાવવામાં આવ્યાં હતાં.
