દિવસ દરમિયાન દરેક વ્યક્તિ, નોકરી, ધંધા, વ્યવસાય, ખેતીકામ, મજુરી જેવા આર્થિક ઉપાર્જન તેમજ સામાજિક કામમાં વ્યસ્ત હોવાથી પ્રાથમિક સુવિધાઓ અને જરૂરિયાતોની રજુઆત માટે સમય ફાળવી શકતો નથી. દિવસભરની બધી જ પ્રવૃત્તિઓથી પરવારી રાત્રિના સમયે પડતર પ્રશ્નો અને સમસ્યાઓને સારી રીતે વાચા આપી શકે તે માટે રાત્રિ સભાઓ યોજવામાં આવે છે.
જે અંતર્ગત મહીસાગર જિલ્લાના લુણાવાડા તાલુકાના પાનમ પાલ્લા ગામમાં આવેલ પ્રાથમિક શાળામાં મહીસાગર જિલ્લા કલેક્ટર આર.બી.બારડના અધ્યક્ષ સ્થાને ગામની રાત્રિસભા યોજાઈ હતી. આ સભામાં સ્કુલની વિધાર્થીનીઓએ સ્વાગત ગીત દ્વારા સભાનો પ્રારંભ કરાવ્યો હતો.
ગ્રામ સભામાં વિધવા સહાય, વૃદ્ધ પેન્શનના મંજુરી હુકમોનુ પણ વિતરણ કરવામાં આવ્યું હતું. પાનમ પાલ્લા ગ્રામજનોએ આંતરિક રસ્તા, પીવાના પાણીની સમસ્યા, સિંચાઇની સમસ્યા જેવી સમસ્યાઓ રજુ કરી હતી. ઉપસ્થિત અધિકારીઓ દ્વારા ભૌતિક સમસ્યાના નિરાકરણ માટેની ખાતરી આપવામાં આવી હતી. તેમજ અધિકારીઓએ વિવિધ સરકારી યોજનાઓ વિશેની માહિતી પણ ગ્રામજનોને આપી હતી અને જેનો લાભ લેવા ગ્રામજનોને જણાવ્યું હતું.
આ રાત્રિ સભામાં જિલ્લા વિકાસ અધિકારી નેહાકુમારી, પ્રાંત અધિકારી બ્રિજેસ મોડીયા, મામલતદાર સહિત અમલીકરણ અધિકારીઓ અને મોટી સંખ્યામાં ગ્રામજનો ઉપસ્થિત રહ્યા હતા.
