કચ્છમાં ગારમેન્ટ બિઝનેસ પાર્કના પ્રયાસ, મુંબઈગરા કચ્છીઓએ વતનને વિકસાવવા આદર્યો વ્યાયામ

કોરોના મહામારી સામે દેશની લડત સાથે વડાપ્રધાન નરેન્દ્ર મોદીએ દેશને આત્મનિર્ભર કરવા સ્થાનિક વ્યવસાયને પ્રોત્સાહન આપવાની વાત કરી છે. ખાસ કચ્છના ભુકંપ પછીનો દાખલો આપીને જયારે આત્મનિર્ભરતા સંકલ્પ રજુ કરાયો છે. ત્યારે કચ્છવાસીઓએ કચ્છને વધુ સમૃધ્ધ અને સક્ષમ બનાવવા મક્કમ પગલાં ભરી રહ્યાં છે. કચ્છીઓમાં કોરોના વાયરસ કોવીડ-19 એ એક નવી લાગણીને પ્રબળ બનાવી દીધી છે. ’ સમગ્ર કચ્છમાં આધુનિક ખેતી દ્વારા સમૃધ્ધિનો મંત્ર સાકાર થઇ રહયો છે. નર્મદા કેનાલ અને ખેત તલાવડીઓથી કચ્છીઓ આધુનિક ખેતી તરફ તો વળ્યા જ છે. પણ હવે મુંબઇગરા કચ્છીઓ પણ વાગડ વિકસાવવા તત્પર બન્યા છે. આપણો ‘‘વાગડ આપણો વિકાસ’

કચ્છ : પ્રવર્તમાન વૈશ્વિક મહામારી નોવેલ કોરોના વાયરસ કોવીડ-19ના કારણે ઉભી થયેલી રોજગાર ધંધાની પરિસ્થિતિએ સૌને વતનનું વ્હાલ વધુ ઉપજયુ છે. મુંબઇગરા વાગડવાસીઓ પણ કે, જેઓ ગારમેન્ટના વ્યવસાય સાથે સંકળાયેલા છે. તેઓ વતનની વાટે વળ્યા છે. અને હવે વતનમાં જ ગારમેન્ટ હબ વિકસાવવા પ્રયાસ શરૂ થયા છે. મુંબઇમાં વસેલા ગારમેન્ટ વેપારીઓએ કચ્છમાં બિજનેસપાર્ક ‘‘કચ્છ ગારમેન્ટ ઝોન’’ બનાવવા માટે ઓનલાઇન ફોર્મ ભરવાનું ચાલુ કર્યુ છે. જે 10મી જુન-2020 સુધી ભરી શકાશે. કચ્છ બિઝનેસ પાર્કમાં જોડાવવા સુધી કુલ 1540 લોકોએ http://www.formlets.com પર ઓનલાઇન ફોર્મ પણ ભરી દીધા છે. મહારાષ્ટ્રમાં અને ખાસ કરીને મુંબઈમાં અંદાજે 20 હજાર ઉપરાંત કચ્છી વેપારીઓ ગારમેન્ટ ઈન્ડસ્ટ્રીઝ સાથે સંકળાયેલા છે. તેમની સાથે સ્થાનિકો પણ આ ધંધામાં રસ દાખવી રહ્યાં છે.

ભચાઉ નગરપાલિકાના પ્રમુખ કુલદીપસિંહ જાડેજા જણાવે છે કે, માંડવીના ધારાસભ્ય વિરેન્દ્રસિંહ જાડેજાની આગેવાની હેઠળ કચ્છ બિઝનેસપાર્ક સામખીયાળી અને ભચાઉની વચ્ચેના હાઈવે પાસેની 60 થી 70 એકર જમીન પર બનાવવાની યોજના આકારમાં છે. જયાં બે હજાર ફૂટના મેન્યુફેકચરીંગ યુનિટો શરૂ કરી શકાશે. કચ્છમાં વિશ્વની અગ્રગણ્ય કંપનીઓ છે, ત્યારે વતનીઓના ગારમેન્ટ વ્યવસાય માટે તેઓ કેન્દ્ર અને રાજય સરકારનો સહયોગ સાથે કચ્છ વિકાસમાં આગવું મોરપીચ્છ ઉમેરાશે.ગારમેન્ટસ મેન્યુફેકચરીંગ વર્કર વેલ્ફેર એસોસિએશનના પ્રમુખ અને મુંબઇના વેપારી અનિલભાઇ ગામીએ પણ ભચાઉ ખાતે જણાવ્યું હતું કે, મુંબઇમાં છેલ્લા બે માસથી તમામ કામકાજ બંધ હોવાથી કારીગરો નથી અને આગામી મહિનાઓ સુધી કામકાજ નથી અને આગામી મહિનાઓ સુધી કામકાજ શરૂ થવાની શકયતાઓ દેખાતી નથી. પહેલાના સમયમાં આર્થિક સગવડો અને રોજગારીના મળતા બહારગામ જવું પડતું હતું. પરંતુ હવે ગુજરાત અને કચ્છની પરિસ્થિતિ બદલાઇ છે. વર્તમાન સમયમાં કચ્છમાં જોઇતી તમામ સુવિધાઓ સરળતાથી મળતી થઇ ગઇ છે. ત્યારે વાગડને વિકસાવી સ્થાનિક રોજગારી ઉભી કરવાની સોનેરી અવસરને ઉજાગર કરવાનો પ્રયાસ છે. અનિલભાઇ ગામી દાદરમાં 30 વર્ષથી લેડીઝ ગારમેન્ટ મેન્યુફેકચરીંગનું કામ કરી રહ્યાં છે. અંદાજે 20 હજારથી વધુ વેપારીઓ ગારમેન્ટ બિઝનેશ સાથે સંકળાયેલા છે. ત્યારે તેઓ કચ્છમાં મળતી રેલ, ટ્રાન્સપોર્ટ સુવિધાઓ એરપોર્ટ જેવી આધુનિક તમામ સુવિધાઓ અને સાનુકુળ વાતાવરણની તકને ઝડપી લેવાની તૈયારી બતાવી છે. ગારમેન્ટ ઈન્ડ્રસ્ટ્રીઝ જયારે ઓનલાઇન ઓર્ડરથી ચાલી રહેલ હોવાથી મુંબઇ કરતાં વતનમાં મેન્યુફેકચરીંગ ઘણું સસ્તુ પડે એ વિચારથી ઘણા વેપારીઓ કાયમી રીતે વાગડમાં વસવાટ કરી ‘‘કચ્છ બિઝનેસ પાર્ક’’ સાકાર કરવા કચ્છવાસીઓ ઉત્સાહિત છે. ત્યારે આ પાર્ક બની જશે તો કચ્છમાં વિકાસને વધુ ગતિ મળશે તે નકકી છે.