શિપિંગ મંત્રાલયે આપેલું લક્ષ્યને કંડલા પોર્ટે કર્યું પૂર્ણ

કચ્છઃ દેશના નંબર વન મહાબંદર દિનદયાલ પોર્ટ કંડલા પોર્ટે પોતાનું લક્ષ્યાંક સિદ્ધ કરી લીધું છે. વર્ષ 2018-19નું શિપિંગ મંત્રાલયે આપેલું 115 મિલિયન મેટ્રિક ટનનું લક્ષ્ય માર્ચના અંતિમ દિવસે પાર કરી લઈને મહત્ત્વની સિદ્ધિ મેળવી હતી. ડીપીટી પ્રશાસનમાંથી મળતી માહિતી પ્રમાણે, ગત વર્ષનું 105 મિ. મે. ટનનું લક્ષ્ય આ વર્ષે વધારીને 115 મિ. મે. ટન કરાયું હતું.

પ્રાપ્ત વિગત અનુસાર,માર્ચ માસની અંતિમ દિનઆ માલ-સામાન હેરફેરનો આંકડો 115.40 મિ. મે. ટને પહોંચતાં લક્ષ્યાંક સિદ્ધ થયો હતો. ગત વર્ષની તુલનામાં આ વર્ષે ડીપીટીએ પોતાના હેન્ડલિંગના આંકડામાં 4.82 ટકા જેવો વૃદ્ધિદર મેળવ્યો હતો. પ્રસાશને તમામ અધિકારી- કર્મચારીઓને અભિનંદન આપવા સાથે બંદરના વપરાશકારો, આયાત-નિકાસ-કારોનો આ સિદ્ધિ મેળવવા બદલ આભાર પ્રગટ કર્યો હતો.

સત્તાવારમાહિતી પ્રમાણે, વર્ષ 2018-19 દરમ્યાન દીનદયાલ બંદરે કુલ્લ આયાત 847.69 લાખ ટન, જ્યારે નિકાસ 301.25 લાખ ટન થઈ હતી. કન્ટેનર મૂવમેન્ટનો આંક 5.07 લાખ ટનનો રહ્યો હતો. આમ, કુલ્લે 1154.02 લાખ ટન, એટલે કે 115.40 મિલિયન મેટ્રિક ટન કાર્ગો હેન્ડલ થયો હતો. ડીપીટી હસ્તક કંડલા અને વાડીનાર એમ બે બંદર હોવાથી આ સિદ્ધિમાં કંડલાનો ડ્રાય કાર્ગો 460.66 લાખ ટન, પ્રવાહી કાર્ગો 145.96 લાખ ટન, વાડીનારનો પ્રવાહી કાર્ગો 542.34 લાખ ટન રહ્યો હતો. આયાત-નિકાસમાં પીઓએલ ક્રૂડ, પીઓએલ પ્રોડક્ટ્સ, ઓર, થર્મલ કોલ, મીઠું, સિલિકા, મશીનરી, આયર્ન અને સ્ટીલ, ખાંડ, કન્ટેનર વગેરેનો સમાવેશ થાય છે.