મહેમદાવાદમાં વૃક્ષ વીજ ટ્રાન્સફોર્મર પર પડતા મકાન, દુકાન અને ટ્રેકટરને નુકસાન

ખેડાઃ મહેમદાવાદમાં ભારે વસસાદના કારણે મહાકાય વૃક્ષ ધરાશાયી થઈ વીજ ટ્રાન્સફોર્મર પર પડયુ હતું. જેના કારણે નજીકમાં આવેલા મકાન, દુકાન અને ટ્રેક્ટરને નુકસાન પહોંચ્યુ હતું. ત્યાર બાદ તંત્રના અધિકારીઓએ ઘટનાસ્થળે પહોંચી પરિસ્થિતિનો તાગ મેળવ્યો હતો.

જીલ્લામાં નડિયાદ, કપડવંજ, મહેમદાવાદ સહિતના વિસ્તારોમાં ભારે વરસાદ પડયો હતો. વરસાદ તેમજ વાવાઝોડાને કારણે નીચાણવાળા વિસ્તારોમાં પાણી ભરાયા હતા. મહેમદાવાદમાં સિંચાઈ વિભાગની કચેરીની દીવાલ ધરાશાયી થઇ હતી. મહેમદાવાદના રામનગર વિસ્તારમાં વર્ષો જૂનો ઘટાદાર વડલો તુટીને હાઈવોલ્ટેજ ટ્રાંન્સફોર્મર પર પડ્યું હતું. જેના કારણે આ વિસ્તારમાં વીજ પુરવઠો ખોરવાઈ ગયો હતો.

વડ પડવાથી નજીકના મકાન, દુકાન તેમજ ટ્રેકટરને નુકશાન થયું હતું. વૃક્ષ ધરાશાયી થવાને પગલે વિસ્તારનો વાહન વ્યવહાર પણ ખોરવાઈ ગયો હતો. આ ઘટનામાં સદનસીબે કોઈ જાનહાની થઈ નહોતી. ઘટનાને પગલે મામલતદાર, નગરપાલિકા પ્રમુખ તેમજ MGVCLના અધિકારીઓએ ઘટના સ્થળે પહોંચી પરિસ્થિતિનો તાગ મેળવી જરૂરી કાર્યવાહી હાથ ધરી હતી.