જૂનાગઢ : ગુજરાતમાં રહીને મજૂરી કરતા પરપ્રાંતીય લોકો હવે લોકડાઉનને લઈને તેમના વતન તરફ જવાની માગ કરી રહ્યા છે. ત્યારે આજે રવિવારે જૂનાગઢ તાલુકા અને અન્ય વિસ્તારમાંથી ૫૦૦ કરતા વધુ શ્રમીકોને ટેલિફોનિક સંદેશા મારફત પ્રાંત અધિકારીની કચેરીએ બોલાવવામાં આવ્યા હતા, પરંતુ અહીં તેમના માટેની કોઇ પણ વ્યવસ્થા કરવામાં આવી નહોતી. જેને લઇને આ શ્રમીકોમાં હવે ભારો ભાર રોષ જોવા મળી રહ્યો છે. જો તંત્ર પાસે કોઈ વ્યવસ્થા હતી જ નહીં તો આ શ્રમીકોને શા માટે આજે રવિવારે બોલાવવામાં આવ્યા છે તેવા સવાલો જૂનાગઢ આવેલા શ્રમીકો વહીવટી તંત્રને પૂછી રહ્યા છે.
સરકારના દાવાની પોલ ખોલતા ઉત્તર પ્રદેશના શ્રમીકો આટલું પૂરતું ન હોય તે મુજબ અહીં આવેલા દરેક શ્રમીકો પાસેથી રેલવેની ટિકિટ વતન જવા માગતા દરેક મજૂરે વ્યક્તિગત પોતાની રીતે ખરીદવાની ફરજ પાડવામાં આવી હતી. રાજ્ય અને કેન્દ્ર સરકાર શ્રમીકોને વિના મુલ્યે તેમના વતન પહોંચાડી રહી છે તેવા દાવાઓનો ખુદ મજૂરો જ છેદ ઉડાવી રહ્યા છે. જે પ્રમાણે લોકડાઉનમાં ફસાયેલા મુસાફરોને તેમના વતન પહોંચાડવા માટે દાવા અને પ્રતિ દાવાઓ કેન્દ્ર અને રાજ્ય સરકાર દ્વારા કરવામાં આવી રહ્યા હતા. આજે રવિવારે સવારે શ્રમિકોને તેમના પરિવાર સાથે પ્રાંત અને મામલતદાર કચેરીએ બોલાવવામાં આવ્યા હતા. તે સ્થળ પર આવી ચૂક્યા છે, પરંતુ અહીં તેમના માટે ભોજન તો દૂરની વાત છે પીવાના પાણીની વ્યવસ્થા પણ વહીવટીતંત્ર દ્વારા કરવામાં આવી નથી. જેને લઇને આ શ્રમિકોમાં ભારે રોષની સાથે ચિંતા પણ જોવા મળી રહી છે.
