ભારે વરસાદને પગલે ભારતી આશ્રમ સુધી પહોંચી ગયું સિંહોનું ટોળું, જુઓ Video

જૂનાગઢ: ગિરનારના જંગલમાં ભારે વરસાદમાં સિંહનું ટોળું ભારતી આશ્રમના દરવાજા સુધી પહોંચી ગયું હતું. છેલ્લા દસ દિવસથી ગિરનાર પર્વત પર સતત અને અવિરત વરસાદ પડી રહ્યો છે. જેને કારણે હવે સિંહો પણ જંગલની બહાર નીકળી ગીરી તળેટી તરફ આવતા જોવા મળી રહ્યા હતા. ગઈકાલે રાત્રિના સમયે પાંચ સિંહનુ એક ટોળું જંગલમાંથી બહાર નીકળીને ભારતી આશ્રમના દરવાજા સુધી પહોંચી ગયું હતું.

ગિરિતળેટીમાં સતત અને અવિરત વરસાદ પડી રહ્યો છે, છેલ્લા એક અઠવાડિયાથી તળેટી તેમજ ગિરનાર પર્વત પર વરસાદ વરસી રહ્યો છે. જેના કારણે જંગલના પશુ અને પ્રાણીઓ પણ હવે પરેશાન થઈ રહ્યા છે. જંગલમાં સતત અને ભારે વરસાદને કારણે પાંચ સિંહોનું એક જૂથ જંગલ વિસ્તારમાંથી બહાર નીકળીને ભારતી આશ્રમના દરવાજા સુધી પહોંચી ગયું હતું.

ગત રાત્રિના સમયે પાંચ સિંહોનું ટોળું ગીરી તળેટીમાં આવેલા ભારતી આશ્રમની બહાર નીકળતું હોય તેવો વીડિયો સામે આવ્યો હતો. ભારતી આશ્રમની આસપાસ માનવ વસાહત પણ છે. તેમજ આશ્રમમાં સાધુ-સંતો પણ વિશ્રામ લેતા હોય છે. સિંહોના ટોળાનું આ વિસ્તારમાં ચહલ પહલને કારણે થોડી ચિંતા ઉભી કરી છે, પરંતુ રાત્રિના સમયે બહાર નીકળેલું સિંહોનું જૂથ કોઈપણ પ્રકારના નુકસાન કર્યા વગર પરત જંગલમાં ફર્યું હશે તેવું લાગી રહ્યું છે.