ચૂંટણી અધિકારી સમક્ષ ફોર્મ ચકાસણીના સમયે હારૂનભાઇ સમા દ્વારા દર્શાવવામાં આવેલી વિગતો પ્રમાણે તેમને 3 સંતાનો હોવાને કારણે હવે તેઓ ચૂંટણી લડવાને પાત્ર નહીં થતાં તેમનું ફોર્મ સોમવારે રદ થયું છે. જેને લઇને જૂનાગઢ મનપાના વોર્ડ નંબર-3માં ભાજપના ત્રણ સત્તાવાર ઉમેદવારો ચૂંટણી લડશે. ચૂંટણી પરિણામો પહેલા ભાજપને એક કોર્પોરેટરની અત્યારે જ ખોટ પડી ગઈ છે.
પ્રદેશ ભાજપ દ્વારા જૂનાગઢ મનપાના ઉમેદવારોની યાદી જાહેર કરવામાં આવી હતી. જેમાં હારૂનભાઇ સમાની પત્ની મુમતાજ બેન સમાને ઉમેદવાર બનાવવામાં આવ્યા હતા. આ યાદીમાં ભાજપના સિનિયર કોર્પોરેટર ભરત કારેણાને ચૂંટણી લડવા માટે પક્ષે આદેશ કર્યો હતો. પરંતુ ભરત કારેણાએ ચૂંટણી લડવાનો ઈનકાર કરતા ભાજપે અહીંથી ઉમેદવારોની ફેરબદલી કરવાની ફરજ પડી હતી. જેમાં મુમતાજબેનની જગ્યા પર હારુન ભાઈને ઉમેદવાર બનાવવામાં આવ્યા હતા.
ભરત કારેણાની જગ્યા પર જૂનાગઢના બુટલેગર ધીરેન કારીયાની પત્ની નિશા કારીયાને ઉમેદવાર બનાવવામાં આવ્યા હતા. જે સમયે ભાજપ દ્વારા યાદી જાહેર કરી ત્યારે ભરત કારેણાએ ચૂંટણી લડવાનો ઈનકાર કરતા વોર્ડ નંબર 3માં ભાજપને પણ ઉમેદવારથી સંતોષ માનવો પડશે તેવું લાગી રહ્યું હતું. પરંતુ બુટલેગર એવા ધીરેન કારીયાની પત્નીને ભાજપે ટિકિટ આપતા ભાજપના સત્તાવાર ચાર ઉમેદવારો ચૂંટણી જંગમાં રહ્યા હતા.
સોમવારે ફોર્મ ચકાસણીના દિવસે હારુનભાઈનું ઉમેદવારી પત્રક ત્રણ સંતાનો હોવાને કારણે રદ્દ થઇ જતા ફરીથી ભાજપ વોર્ડ નંબર ત્રણમાં ત્રણ ઉમેદવારો સાથે ચૂંટણી લડી રહ્યું છે. ચૂંટણી પરિણામ પહેલા જ ભાજપને વોર્ડ નંબર ત્રણમાં એક કોર્પોરેટરની ખોટ પડશે.
