શુક્રવારથી ગરવા ગઢ ગિરનારની લીલી પરિક્રમાની શુભ શરૂઆત થવાની છે. પરિક્રમાનો પ્રથમ પડાવ એટલે ભવનાથ અને અંતિમ પડાવ એટલે કે બોરદેવી. ભગવાન શ્રી કૃષ્ણ દ્વારા લીલી પરિક્રમાની શરૂઆત કરાઈ હતી, ત્યારથી આ બોરદેવીની જગ્યાનું ધાર્મિક મહત્વ છે. ભગવાન કૃષ્ણ દ્વારા બહેન સુભદ્રા અને અર્જુનના લગ્ન થાય, તે માટે ગિરનારની પરિક્રમા કરી હતી, ત્યારબાદ પરિક્રમાની શરૂઆત થઈ હતી. પરિક્રમાના અંતિમ પડાવ એટલે કે બોરદેવી નજીકના જંગલમાં બોરડીના વૃક્ષ નીચે ભગવાન શ્રીકૃષ્ણએ તેમની બહેન સુભદ્રા અને અર્જુનના લગ્ન કરાવ્યા હતાં, ત્યારથી અહીં માં અંબાના સ્વરૂપ સમાન બોરદેવી માતાની પૂજા થતી આવે છે.
લીલી પરિક્રમાનો અંતિમ પડાવ એટલે બોરદેવી બહેન સુભદ્રા અર્જુનની ધર્મ પત્ની બને તે માટે પરિક્રમા કરવાનો નિર્ધાર ભગવાન શ્રીકૃષ્ણએ વ્યક્ત કર્યો હતો. કારતક સુદ અગિયારસથી પૂનમ સુધી ભગવાન શ્રીકૃષ્ણ ગીરનારના જંગલમાં વાસ કરીને પરિક્રમા કરી હતી. તેનો ઉલ્લેખ ધાર્મિક પુરાણોમાં જોવા મળે છે. સૌપ્રથમ ભગવાન શ્રીકૃષ્ણ દ્વારા ગિરનારની પરિક્રમા કરવામાં આવી હતી. તે સમયે 33 કોટી દેવતાઓએ ભગવાન કૃષ્ણનું સાનિધ્ય મળી રહે, તે માટે અહીં વસવાટ કર્યો હોવાની ધાર્મિક માન્યતા છે. તેથી ગિરનારમાં 33 કોટી દેવતાનો વાસ છે, તેવું પણ માનવામાં આવે છે. ભગવાન શ્રીકૃષ્ણ સાથે પરિક્રમામાં પટ્ટરણી રૂકમણી, બહેન સુભદ્રા, અર્જુન અને અન્ય યાદવકુળના લોકો સાથે હતાં, ત્યારે શરૂ થયેલી ગિરનારની લીલી પરિક્રમા કરવાની ધાર્મિક પરંપરા આજે પણ જળવાઈ રહી છે. દર વર્ષે લાખો લોકો આ પરિક્રમા કરી ધન્ય થાય છે.
