જૂનાગઢ: નવનિયુક્ત પ્રદેશ ભાજપ પ્રમુખ સી.આર.પાટીલ સૌરાષ્ટ્રની બે દિવસીય મુલાકાતે છે. તેમણે કાર્યકરોના કાફલા સાથે બુધવારે સોમનાથથી તેમની સૌરાષ્ટ્ર યાત્રાનો શુભારંભ કર્યો છે. બુધવારે સાંજના 5:00 કલાકે તેમની યાત્રા જૂનાગઢ જિલ્લાના માળિયા અને કેશોદ ખાતે આવી પહોંચી હતી. જેમાં સામાજિક અંતર અને ફરજિયાત માસ્કના નિયમનો ખુલ્લેઆમ ભંગ થતો જોવા મળ્યો હતો.
રાજ્ય સરકાર દ્વારા તમામ પ્રકારના ઉત્સવો અને મેળાવડા પર પ્રતિબંધ લગાવવામાં આવ્યો છે. સામાજિક કાર્યો તથા લગ્નમાં પણ 50 કરતા વધુ વ્યક્તિઓને ભેગા કરવાની મનાઇ કરવામાં આવી છે. 20થી વધારે લોકો સ્મશાન યાત્રામાં જોડાઈ ન શકે તેવા આદેશો સરકાર દ્વારા આપવામાં આવ્યા છે. આ ઉપરાંત જો વ્યક્તિએ માસ્ક ન પહેર્યુ હોય તો 1000 સુધીનો દંડ ફટકારવામાં આવે છે. પરંતુ આ બધા નિયમો ફક્ત સામાન્ય માણસો માટે જ હોય તેવુ સાબિત થઇ રહ્યું છે. મોટાભાગના નેતાઓ દ્વારા સરકારી નિયમોનું છડેચોક ઉલ્લંઘન થતું જોવા મળે છે.
