જૂનાગઢની જૂની સિવિલ હોસ્પિટલમાં બનશે જિલ્લા કોર્ટ અધ્યતન બિલ્ડીંગ

જૂનાગઢઃ શહેરની મધ્યમાં આવેલી જૂની સિવિલ હોસ્પિટલમાં હાઈરાઈઝ ઇકો ફ્રેન્ડલી તેમજ સૌર ઊર્જાના મહત્તમ ઉપયોગ સાથેનો હાઈરાઈઝ જિલ્લા કોર્ટની બિલ્ડીંગ બનાવવાની રાજ્ય સરકારે સૈદ્ધાંતિક મંજૂરી આપી દીધી છે. જેનું કામ આગામી દિવસોમાં હાથ ધરવામાં આવશે.

છેલ્લા કેટલાક સમયથી જૂનાગઢ શહેરની મધ્યમાં આવેલા જૂના સિવિલ હોસ્પિટલ કમ્પાઉન્ડમાં જૂનાગઢ જિલ્લા કોર્ટને સ્થળાંતર કરવાની પ્રક્રિયા તેમજ જૂનાગઢમાંથી માંગણીઓ શરૂ થઈ હતી. જેને હવે રાજ્ય સરકારે સૈદ્ધાંતિક મંજૂરી આપી દેતા આગામી દિવસોમાં જૂની સિવિલ હોસ્પિટલના કમ્પાઉન્ડમાં આધુનિક કહી શકાય તેવું સૌરાષ્ટ્રનું જિલ્લા કોર્ટ ભવન નિર્માણ પામવા જઈ રહ્યું છે.

આ કોર્ટ કમ્પાઉન્ડ અંદાજિત ૩૮ હજાર ચોરસ મીટર વર્ગમાં નિર્માણ પામશે. જિલ્લા ન્યાયાલયના ભવનને ગ્રીન બિલ્ડિંગ એટલે કે ઇકોફ્રેન્ડલી બનાવવામાં આવશે. તેમજ આ ભવનમાં સૌર ઊર્જાનો મહત્તમ ઉપયોગ થાય તે પ્રકારે તેનું નિર્માણ કરવામાં આવશે, જ્યારે આ તૈયાર થઈ જશે, ત્યારે તે સમગ્ર સૌરાષ્ટ્રનું આઇકોનિક જિલ્લા કોર્ટ ભવન તરીકે પણ ઓળખાશે. આધુનિક સુવિધા અને કુદરતમાંથી મળતી મૂકત ઊર્જાનો વિશેષ ઉપયોગ કરીને ભવનનું નિર્માણ કરવા માટે રાજ્ય સરકાર આગળ વધી રહી છે. નવું કોર્ટ બિલ્ડિંગ બનતા જૂનાગઢ શહેરના અલગ અલગ વિસ્તારોમાં બેસતી તમામ court એક ભવનમાં સમાવી લેવામાં આવશે. જેને લઇને અરજદારોએ પણ ધક્કા ખાઈને સમય નહીં બગાડવો પડે તેવી સુવિધા સભર ભવનનું નિર્માણ થવા જઇ રહ્યું છે

જુનાગઢમાં મેડિકલ કોલેજ મળતાની સાથે જ નવી સિવિલ હોસ્પિટલનું નિર્માણ કરવામાં આવ્યું હતું, ત્યારથી આ જગ્યા બિન ઉપયોગી અને પડતર બની રહી હતી, ત્યારે શહેરની મધ્યમાં આવેલી આ વિશાળ જગ્યા પડતર પડી રહે અને ખંડેરના રૂપમાં પરિવર્તિત થાય તેની જગ્યા પર રાજ્ય સરકારે જૂનાગઢ જિલ્લા કોર્ટ ભવનના બાંધકામ માટે જમીન ફાળવી આપતા આ લડાઇ સાથે જોડાયેલા લોકો પણ હવે ખુશી વ્યક્ત કરી રહ્યા છે.