જામનગર: રાજ્યમાં આ વર્ષે 100 ટકાથી વધુ વરસાદ નોંધાયો છે. જામનગરમાં ભારે વરસાદ પડતા જગતનો તાત મુશ્કેલીમાં મુકાયો છે. જોકે, રાજ્ય સરકારે જાહેરાત કરી છે કે, 33 ટકા જેટલું નુકસાન થયું હોય તેવા ખેડૂતોને વળતર આપવામાં આવશે.
કૃષિપ્રધાન આર.સી. ફળદુએ કહ્યું હતું કે, 15 દિવસમાં તમામ ખેડૂતોના સર્વેની કામગીરી પૂર્ણ કરવામાં આવશે. ત્યારે કૃષિપ્રધાનના મત વિસ્તારના ખેડૂતો જ મુશ્કેલીમાં મુકાયા છે.
રાજ્યના કૃષિ પ્રધાન આર. સી. ફળદુના મત વિસ્તારના એટલે કે, ધુવાવ ગામના ખેડૂતો એવી માગ કરી રહ્યા છે કે, જે કર્મચારીને સર્વેની કામગીરી સોંપવામાં આવે તેમને ખેતી વિશેનું જ્ઞાન હોવું જરૂરી છે. ગત વર્ષે ખેતી વિષયનું જ્ઞાન ન ધરાવતા અધિકારીઓ દ્વારા સર્વે કરવામાં આવ્યો હતો. જેના કારણે અનેક જગ્યાએ હોબાળા પણ થયો હતો અને ખેડૂતોએ વિરોધ પણ કર્યો હતો.
કૃષિ પ્રધાનના મતવિસ્તાર ધુવાવ ગામના ખેડૂતોએ મોટા પ્રમાણમાં કપાસ, મગફળીનું વાવેતર કર્યું છે. પરંતુ વરસાદના કારણે તમામ પાક નિષ્ફળ ગયો છે. જામનગર પંથકમાં લીલા દુષ્કાળ જેવી સ્થિતિ સર્જાઇ છે. ત્યારે જગતનો તાત મુશ્કેલીમાં મુકાયો છે.
ઉલ્લેખનીય છે કે, સર્વેની કામગીરી રાજ્ય સરકાર જે તે એજન્સીઓને સોંપતી હોય છે. એજન્સીમાં બિન અનુભવી કર્મચારીઓ ખેતી વિશેનું જ્ઞાન ધરાવતા હોતા નથી અને સર્વેની કામગીરી કરતા હોવાનું ગત વર્ષે બહાર આવ્યું હતું.
