જામનગરમાં એલર્ટ સિટીઝન એપ્લિકેશન દ્વારા હોમક્વોરન્ટાઇન લોકો પર ડિજિટલ સર્વેલન્સ

લોકડાઉનની સુચારૂ રૂપે અમલવારી કરાવવા માટે જામનગર પોલીસ અધિક્ષક શરદ સિંઘલ અને IPS સફીન હસન તથા નાયબ પોલીસ અધિક્ષક એ.પી.જાડેજાના માર્ગદર્શન મુજબ જામનગર પોલીસ એલર્ટ સીટીઝન એપ્લિકેશન બનાવવામાં આવી છે.

જામનગર : કોરોના વાયરસની મહામારીએ ભારતમાં પણ ગંભીર રૂપ ધારણ કરી લીધું છે. જામનગર જિલ્લામાં પણ બહારથી આવેલ લોકોમાં વધુ પોઝિટિવ કેસ જોવા મળ્યા છે. ત્યારે જામનગર જિલ્લામાં કોરોના વાયરસનું સંક્રમણ ન વધે તે અનુસંધાને હોટેલ, રેસ્ટોરન્ટ તથા ભીડભાડવાળી જગ્યાઓ પર ચેકિંગ કરી લોકોને ભીડમાં ન રહેવા તેમજ કોરોના વાયરસ સંબંધી તકેદારી રાખવાના ભાગરૂપે સરકાર દ્વારા આપવામાં આવેલ માર્ગદર્શન મુજબ સાવચેતી રાખવા અને જાહેર સ્થળો પર લોકોને અનઅધિકૃત રીતે એકઠા ન થવા તેમજ હોમ ક્વોરન્ટાઇન વ્યક્તિએ નિયમોનું કડકપણે પાલન કરવા અંગેનું જામનગર જિલ્લા મેજીસ્ટ્રેટ રવિશંકર દ્વારા જાહેરનામું બહાર પાડી લોકોને જણાવવામાં આવ્યું છે.

આ એપ્લિકેશન દ્વારા હોમ ક્વોરન્ટાઇન કરેલા વ્યક્તિઓ પર ડિજિટલ સર્વેલન્સ રાખવામાં આવશે. હોમ ક્વોરન્ટાઇન કરેલા કોઈ વ્યક્તિ પોતાના ઘરની બહાર નીકળે અને ઘરથી દૂર જાય તો તે બાબતનો રિપોર્ટ એપ્લિકેશનમાં જનરેટ થાય છે. જેથી પોલીસ વિભાગને તાત્કાલિક જ તેની માહિતી મળે છે. પોલીસ દ્વારા કોઇપણ સમયે હોમ ક્વોરન્ટાઇન વ્યક્તિને ફોન કરી તેઓનો હાલનો ફોટો અપલોડ કરવા માટે પણ જણાવવામાં આવે છે. જો બહાર હોય તો તે પણ ખબર પડી શકે છે. આ ઉપરાંત આ સિસ્ટમમાં અક્ષાંશ-રેખાંશ ચોક્કસ લોકેશન બતાવે છે. તેથી તે વ્યક્તિ કોઈ ચોક્કસ જગ્યાએ ગયા હોય તે અંગેનો સમય તથા વિસ્તાર સહિતનો રિપોર્ટ જનરેટ થાય છે. આ સિસ્ટમમાં કોઈ વ્યક્તિ એપ્લિકેશન ડાઉનલોડ કર્યા બાદ નેટ બંધ કરે અથવા લોકેશન બંધ કરે તો પણ તે બાબતનો રિપોર્ટ એપ્લિકેશનમાં દર્શાવવામાં આવે છે. અને પોલીસ વિભાગને તાત્કાલિક તેની જાણ થાય છે.

એલર્ટ સિટીઝન એપ્લિકેશન દ્વારા હોમક્વોરન્ટાઇન લોકો પર ડિજિટલ સર્વેલન્સ

આ એપ્લિકેશન દ્વારા જામનગરમાં જાહેરનામાનો ભંગ કરતા હોમ ક્વોરન્ટાઇનમાંથી બહાર નીકળેલા એક વ્યક્તિ પર કેસ પણ નોંધાયેલો છે. જેમાં ગોકુલ નગર, રડાર રોડ, નારાયણ નગર, શ્રુતિ પાર્ક બ્લોક નં.૫૬/૫ જામનગરમાં રહેતા ૫૩ વર્ષીય કાંતિભાઇ ઉર્ફે કાનાભાઈ અંબારામભાઈ સરડવા હોમ ક્વોરન્ટાઇનનો ભંગ કરી ઘરની બહાર નીકળતા તેમના પર જામનગર પોલીસ એલર્ટ સીટીઝન એપ્લિકેશનના રિપોર્ટ આધારે આઇ.પી.સી. કલમ 270, 188 તથા ડિઝાસ્ટર મેનેજમેન્ટ એક્ટ-2005 ના કાયદાની કલમ 51 (બી) મુજબની કાર્યવાહી પણ થઇ છે. આ એપ્લીકેશન દ્વારા પોલીસ ઇન્સ્પેક્ટરને તેના વિસ્તારના હોમ ક્વોરન્ટાઇનનો ભંગ કરતા વ્યક્તિ વિશે પોતાના ફોન પર જ એલર્ટ મળી જાય છે. તેમ જણાવતા સફીન હસનએ કહ્યુ હતું કે, હોમ ક્વોરન્ટાઇન કરતા સમયે પોલીસની ટીમ અને આરોગ્યની ટીમ સાથે હોય છે. ત્યારે જ ક્વોરન્ટાઇન કરાતા વ્યક્તિના ફોનમાં આ એપ્લિકેશન ડાઉનલોડ કરવામાં આવે છે. અને તેની વ્યક્તિગત માહિતી જેવી કે નામ, સરનામુ, ક્વોરન્ટાઇન પીરીયડ, બ્લડ ગૃપ, ટ્રાવેલ હિસ્ટ્રી વગેરે માહિતી એપ્લીકેશનમાં ફીડ કરવામાં આવે છે. અંદાજે 4000 લોકોએ આ એપ્લિકેશન ડાઉનલોડ કરી છે. ફેશીયલ રેકોગ્નીશન સિસ્ટમઅને જી.પી.એસ.ના આધારે કામ કરે છે. દર 12 કલાકે એક રિપોર્ટ જનરેટ થાય છે. જેના આધારે જે તે વિસ્તારના વ્યક્તિએ હોમક્વોરેન્ટાઇનનો ભંગ કર્યો હશે તેના થાણા ઇન્ચાર્જને તેની માહિતી જશે, ત્યારબાદ તેના વિશેની તપાસ કરી તેના વિરુધ્ધ ગુનો દાખલ કરવામાં આવે છે. જામનગરની જનતા નિયમોનું પાલન કરે અને કોરોનાની બીમારીથી બચી શકે તે માટે પોલીસ વિભાગ સતત કાર્યરત છે. ત્યારે જામનગરવાસીઓ પોલીસને સહકાર આપે અને સુરક્ષિત રહે.