જામનગરના 450 શ્રદ્ધાળુઓ ફાનીમાં ફસાયા, પરિજનો ચિંતાતુર

જામનગરઃ જિલ્લાથી જગન્નાથ પુરીની જાત્રાએ ગયેલા 450 જેટલા શ્રદ્ધાળુઓ ફાની વાવાઝોડામાં ફસાયાની વિગત સામે આવી રહી છે. જામનગરમાં દર વર્ષે મે મહિનામાં મોટી સંખ્યામાં શ્રદ્ધાળુઓ યાત્રા પ્રવાસે જતા હોય છે. જિલ્લામાંથી કિશોરભાઈ દ્વારા 450થી વધુ શ્રદ્ધાળુઓને જગન્નાથ પુરીની યાત્રાએ ટ્રેન મારફતે લઇ જવાતા હોય છે.

જોકે ફાની વાવાઝોડાની અસર ઓરિસ્સા અને અન્ય રાજ્યોમાં ભારે જોવા મળી રહી છે ત્યારે અહીં આવેલા પ્રવાસીઓ પણ તેનો ભોગ બન્યા છે. જામનગરના કિશોરભાઈ સોલંકીના 3 પરિજનો પણ જગન્નાથ પુરીની જાત્રાએ ગયા છે જેઓ પણ આ વાવાઝોડામાં ફસાયા છે. ફાની વાવાઝોડું આવી પહોંચતા તેઓ અહીં ફસાઈ ગયા છે. જોકે જામનગર જિલ્લા વહીવટીતંત્ર દ્વારા ફસાયેલા તમામ લોકોને તાત્કાલિક મદદ મળી રહે તેવા પ્રયાસો હાથ ધરવામાં આવ્યા છે.