ગીરની મધ્યમાં આવેલો કમલેશ્વર ડેમ છલકાયો, જુઓ ડ્રોનની નજરે આકાશી નજારો

કુદરતના અવનવા રંગરુપ છે. પાંચ મહાભૂતમાં પાણી પણ છે. એ ઓછું વરસે તો પણ મુશ્કેલી અને વધુ વરસે તો પણ મુશ્કેલી. જ્યારે જળ તેના માપમાં હોય ત્યારે નદી, ઝરણાં જેવા કુદરતી દ્રશ્યોના ચાહકોને જલસો પડી જતો હોય છે તેમ માનવસર્જિત ડેમમાં પણ જળસંગ્રહ તેની ઉચ્ચતમ સપાટીએ હોય ત્યારે તેના ડ્રોનથી લેવાયેલાં દ્રશ્યો નિહાળવાનો પણ જલસો પડી શકે છે. જુઓ ગીર સોમનાથના કમલેશ્વર ડેમના મનોરમ્ય દ્રશ્યો...

ગીર સોમનાથઃ ગીર સોમનાથ જિલ્લાની અંદર ગીરની મધ્યમાં આવેલો હિરણ-1 (કમલેશ્વર) ડેમ આ સીઝનમાં ગીરમાં થયેલા મૂશળધાર વરસાદને કારણે પૂર્ણ સપાટીએ ભરાયો છે. જંગલની મધ્યે આવેલ કમલેશ્વર ડેમના મનોહર આકાશી દ્રશ્યો દિવસ સુધારી દે એવા છે.

ગીર-સોમનાથ જિલ્લાની અંદર ગીરની મધ્યમાં આવેલો હિરણ-1 (કમલેશ્વર) ડેમ પૂર્ણ સપાટીએ ભરાયો છે. જૂની શૈલીએ બાંધવામાં આવેલો આ ડેમ નવાબીકાળનો માનવામાં આવે છે, ત્યારે આ ડેમને બે તરફથી ગીરનો પહાડી પ્રદેશ અને એક તરફ પાળો બાંધીને રચાયો છે. જે પૂર્ણ સપાટીએ ભરાતાં પાણીના વાસણ જેમ છલકાય છે, ત્યારે પ્રથમવાર આ ડેમના ડ્રોનની નજરેથી લેવાયેલા આકાશી દ્રશ્યો સામે આવ્યાં છે, જે ગીરની સુંદરતાને ઉજાગર કરે છે.

પ્રકૃતિના ખોળે જંગલની વચ્ચે આવેલો આ ડેમ વન્ય પ્રાણીઓ જેવા કે એશિયાટિક સિંહો, સાસણના અલભ્ય ગીધ તેમ જ હજારો જાતના પક્ષીઓ અને સરીસૃપો અને ગીરની વનરાઇ માટે જીવાદોરી ગણાય છે.