- ગીર સોમનાથમાં ભાજપ સામે બળવો કરનારાને પાર્ટીએ લાલ આંખ બતાવી
- જિલ્લા પ્રમુખ માનસિંગ પરમારની કાર્યવાહી
- વેરાવળમાં પાલિકાના પૂર્વ પ્રમુખ અને પૂર્વ ઉપપ્રમુખ સહિત 10 ભાજપમાંથી સસ્પેન્ડ કરાયા
ગીર સોમનાથઃ જિલ્લામાં સ્થાનિક સ્વરાજની ચૂંટણી લડવા સત્તાધારી ભાજપમાં રાફડો ફાટ્યો હતો. જો કે અનેક આગેવાનો અને મોટાભાગના કાર્યકરોની ટિકિટ કપાતા રોષે ભરાયાં હતાં. જેથી પાર્ટીમાં ટિકિટથી વંચિત રહેલા આગેવાનો અને કાર્યકરોમાં ઉકળતો ચરૂ સામે આવ્યો હોય તેમ અનેક આગેવાનોએ પાર્ટી સામે બંડ પોકારી અપક્ષમાંથી ફોર્મ ભરી ઉમેદવારી નોંધાવી દેતા રાજકારણ ગરમાયું હતું. જો કે શિસ્તબદ્ધતા માટે પ્રખ્યાત ભારતીય જનતા પાર્ટીમાં પક્ષના જ આગેવાનો અને કાર્યકરોના બળવાને ગંભીરતાથી લઈ જિલ્લા ભાજપ પ્રમુખે આવા કાર્યકરોને પક્ષમાંથી સસ્પેન્ડ કરાયા છે. આ બાબતે જિલ્લા ભાજપ પ્રમુખ માનસિંગ પરમારે જણાવ્યું હતું કે, સ્થાનિક સ્વરાજની ચૂંટણી દરમિયાન જિલ્લાના દરેક કાર્યકર્તા પાર્ટીના ઉમેદવારોને વિજય બનાવવા માટે અથાગ પરિશ્રમ કરી રહ્યા છે, ત્યારે ભાજપના ઉમેદવારો સામે અપક્ષ ઉમેદવારી નોંધાવી પક્ષ વિરોધી પ્રવૃતિ કરી પાર્ટીને નુકસાન કરનારા 10 આગેવાનો કાર્યકરોને પાર્ટીની તમામ જવાબદારીમાંથી મુક્ત કરી પ્રાથમિક સભ્યપદેથી પણ તાત્કાલિક સસ્પેન્ડ કરવામાં આવ્યાં છે.
સુત્રાપાડામાંથી સસ્પેન્ડ કરાયેલા નરસિંહભાઇ જાદવે ભાજપમાં વર્ષોથી સક્રિય હતાં
આ ઉપરાંત સુત્રાપાડામાંથી સસ્પેન્ડ કરાયેલા નરસિંહભાઇ જાદવે ભાજપમાં વર્ષોથી સક્રિય રહી અનેક મહત્વપૂર્ણ હોદ્દાઓ પર સફળ ફરજ બજાવી હતી. આ વખતની જિલ્લા પંચાયતની ચૂંટણીમાં પ્રાંસલી બેઠકના પ્રબળ દાવેદાર હતાં. જે બેઠક માટે પ્રથમ જિલ્લા પ્રમુખના પીતરાઇભાઇની પસંદગી થઈ હતી. જેમાં વિવાદ ઉભો થતાં નવા નામની પસંદગી થઇ હતી. જેનાથી નારાજ થઇ નરસિંહભાઇએ અપક્ષમાંથી દાવેદારી નોંધાવી હોવાનું જાણવા મળ્યું છે.
સસ્પેન્ડ કરાયેલા કાર્યકરોની યાદી
- રવિભાઈ ગોહેલ (પૂર્વ પ્રમુખ-વેરાવળ નગરપાલીકા)
- ઉદયભાઈ શાહ (પૂર્વ ઉપપ્રમુખ-વેરાવળ નગરપાલીકા)
- પુજાબેન શાહ (કાર્યકર)
- રમેશ ભુપ્તા (પૂર્વનગરસેવક- વેરાવળ નગરપાલીકા)
- હરેશ સોલંકી- (વેરાવળ તાલુકા યુવા ભાજપ ઉપપ્રમુખ)
- નાથાભાઈ લાડવા (કાર્યકર) તમામ વેરાવળના
- નરસિંહભાઈ જાદવ (પૂર્વ પ્રમુખ સુત્રાપાડા તાલુકા ભાજપ)
- જગદીશ બારડ (સુત્રાપાડા તા.પં.ના પૂર્વ પ્રમુખ) સુત્રાપાડા
- પ્રતાપ મહિડા (કોડીનાર ભાજપના પૂર્વ મહામંત્રી)
- વિશાલભાઈ ગાધે (કાર્યકર) બંન્ને રહેવાસી કોડીનાર
અગાઉ પણ ભાજપ સામે કર્યો હતો બળવો
અત્રે નોંધનીય છે કે, ભાજપે વેરાવળના સસ્પેન્ડ કરેલા પૂર્વ પાલિકા પ્રમુખ રવિભાઇ ગોહેલ, પૂર્વ ઉપપ્રમુખ ઉદય શાહે ગત 2015ની પાલીકાની ચૂંટણીમાં પણ પાર્ટીથી નારાજ થઇ અપક્ષ ઉમેદવારી નોંધાવી ચૂંટણી લડી હતી. જેમાં તેમની સજોડે હાર થઇ હતી ત્યારબાદ 2017ની ચૂંટણી સમયે વેરાવળમાં યોજાયેલી ચૂંટણી સભામાં ભાજપના રાષ્ટ્રીય અઘ્યક્ષ અમિત શાહે બન્નેને કેસરી ખેસ પહેરાવી આવકાર્યાં હતાં. હવે પાલિકાની ચૂંટણી આવી છે, ત્યારે ફરી બન્નેએ ટિકિટ ફાળવણીથી નારાજ થઇ ભાજપ સામે ઉમેદવારી નોંધાવી છે. જેને જિલ્લા ભાજપ પ્રમુખે પક્ષ વિરોધી ગણી બન્નેને સસ્પેન્ડ કર્યા છે. હવે જોવાનું રહેશે કે આ વખતની ચૂંટણીમાં આ બન્ને નેતાઓ કમાલ કરી શકે છે કે કેમ?
