કોરોના સંક્રમણને કારણે વેરાવળ બંદરથી માછલીની નિકાસ થઈ ઠપ્પ

કોરોના સંક્રમણ કાળમાં વેરાવળની આર્થિક કરોડરજજુ સમાન ગણાતા માછીમારી ઉદ્યોગ પર હવે ચિંતાના વાદળો જોવા મળી રહ્યા છે. ચાઇના સહિત વિશ્વના અનેક દેશોમાં વેરાવળ બંદર પરથી માછલીઓની જે નિકાસ કરવામાં આવતી હતી તે છેલ્લા 8 મહિનાથી અટકી પડી છે. જેની સાથે ઉદ્યોગકારોના કરોડો રૂપિયાનું ચુકવણું પણ નહીં કરવામાં આવતા માછલીઓની વિદેશમાં નિકાસ કરતા ઉદ્યોગકારો ભારે આર્થિક સંકડામણમાં ફસાતા જોવા મળી રહ્યા છે.

• કોરોના સંક્રમણ એ લીધો માછીમારી ઉદ્યોગનો પણ ભોગ
• છેલ્લા 8 મહિનાથી ચાઇના સહિત વિશ્વના દેશોમાં માછલીઓની નિકાસ અટકી
• માછલીની નિકાસ સાથે સંકળાયેલા ઉદ્યોગકારોના કરોડો રૂપિયા પણ વિશ્વના દેશોમાં ફસાયા
• કોવીડ 19ને લઈને બે થી વધુ મહિનાથી વેરાવળના ઉદ્યોગકારોના કન્ટેનરો ચાઇનામાં ફસાયા

ગીર સોમનાથઃ કોરોનાના કારણે સમગ્ર વિશ્વમાં ધંધા અને રોજગાર પડી ભાંગતા જોવા મળી રહ્યા છે. જેથી સમગ્ર વિશ્વમાં રોજગારીને ટકાવી રાખવી ખૂબ જ મુશ્કેલ બની રહી છે ત્યારે ગીર-સોમનાથ જિલ્લાની કરોડરજ્જુ સમાન અને જિલ્લાનો એકમાત્ર રોજગારી આપતો સ્થાનિક માછીમારી ઉદ્યોગ આજે સંકટમાં જોવા મળી રહ્યો છે. વિશ્વના અનેક દેશોમાં વેરાવળ બંદર પરથી માછલીઓની જે નિકાસ કરવામાં આવી રહી હતી તે છેલ્લા દસ મહિનાથી કોરોના સંક્રમણને કારણે સદંતર બંધ જોવા મળી રહી છે, જેને કારણે વેરાવળ બંદર પરથી વિશ્વના અનેક દેશોમાં માછલીઓની નિકાસ કરતા ઉદ્યોગકારો ભારે ચિંતામાં જોવા મળી રહ્યા છે.

વેરાવળ બંદર

માછલીઓની આયાત 40 ટકા જેટલી ઘટી

કોરોના સંક્રમણ બાદ વિશ્વના દેશોમાં અને ખાસ કરીને ચાઇનામાં માછલીઓની આયાત 40 ટકા જેટલી ઘટી છે, જેને કારણે માછલીઓની નિકાસને લઇને અનેક સમસ્યાઓ ઊભી થઈ છે. કોવીડ તપાસ બાદ વધુમાં વધુ એક દિવસમાં 20 થી લઈને 40 જેટલા કન્ટેનરોની તપાસ કર્યા બાદ ચાઈના સહિત વિશ્વના કેટલાક દેશોમાં સંભાળવામાં આવે છે જેને કારણે છેલ્લા બે મહિનાથી વેરાવળ બંદર પરથી રવાના થયેલા ચાઇના અને અન્ય દેશોના બંદરો પર વેરાવળના કન્ટેનર ત્યાં ફસાયેલા જોવા મળી રહ્યા છે, જેને કારણે માછલીઓની નિકાસનું એકમાત્ર સાધન સમાન કન્ટેનરની પણ તીવ્ર અછત સર્જાઇ રહી છે.

વેરાવળ બંદર

વેપારીઓ પેમેન્ટ વગર માછલી આપવાની વાત કરી રહ્યા છે

આ કન્ટેનર તેની સમય મર્યાદા કરતાં વધુ દિવસ ત્યાં પડી રહેતા ઉદ્યોગકારોને કન્ટેનરનું ભાડું પણ વધુ ચૂકવવું પડી રહ્યું છે. તેમજ ચાઇના સહિત કેટલાક દેશોના સ્થાનિક વેપારીઓ પેમેન્ટ વગર માછલી આપવાની વાત કરી રહ્યા છે, જેને કારણે પણ ઉદ્યોગકારોમાં ભારે ચિંતા વ્યાપી છે.

વેરાવળ બંદર

ભારત સરકારે પણ છેલ્લા એક વર્ષથી MES નહીં ચૂકવતા ઉદ્યોગકારોમાં ચિંતાભારત સરકાર માછીમારી ઉદ્યોગને વર્ષ દરમિયાન MES પેમેન્ટ કરતી હોય છે. આ પેમેન્ટ પણ છેલ્લા એક વર્ષથી કરવામાં આવ્યું નથી. જેને કારણે માછીમારીની નિકાસ સાથે સંકળાયેલા ઉદ્યોગકારો આર્થિક ભીંસ તરફ આગળ વધી રહ્યા છે એક તરફ ચાઇનામાં કન્ટેનરો સતત ઊંચકાઈ રહ્યા છે, ત્યાંથી પરત મંગાવવા ઉદ્યોગકારો માટે ખૂબ મોટુ નુકશાન થઇ શકે છે.

વેરાવળ બંદર

માછીમારીનો એક્સપોર્ટ ઉદ્યોગ સંકટમાં

આવી પરિસ્થિતિમાં ચાઇના સહિત વિશ્વના દેશોમાં પરિસ્થિતિ રાબેતા મુજબ ક્યારે થશે તેને લઈને પણ માછલીની નિકાસ સાથે સંકળાયેલા ઉદ્યોગકારો આશ્વસ્થ નથી. જેને કારણે જિલ્લાની કરોડરજ્જુ સમાન એક માત્ર રોજીરોટી આપતો અને સરકારને ખૂબ મોટું અંતરરાષ્ટ્રીય હુંડીયામણ કમાવી આપતો માછીમારીનો એક્સપોર્ટ ઉદ્યોગ આજે ખૂબ ભારે સંકટની સાથે ચિંતામાં જોવા મળી રહ્યો છે.