ગુજરાતમાં યોજાશે દેશનું સૌથી મોટું ફાર્મા એક્ઝિબીશન, 700 થી વધુ ફાર્મા બાયર્સ રહેશે હાજર

ગાંધીનગરઃ દેશનું ફાર્મા ક્ષેત્ર એક્સપોર્ટ ક્ષેત્રમાં આગળ વધી રહ્યું છે. ત્યારે આજે અમદાવાદ ખાતે ફાર્માસ્યુટિકલ એક્સપોર્ટ પ્રમોશન ઓફ ઇન્ડિયાની એક બેઠક મળી હતી. જેમાં 10 જૂન થી 12 જૂન દરમિયાન ગાંધીનગરના હેલીપેડ ગ્રાઉન્ડ ખાતે દેશનું સૌથી મોટું પ્રદર્શન યોજાવાની જાહેરાત કરવામાં આવી છે. આ પ્રદર્શનમાં 1000થી વધુ સ્ટોલ્સ સાથે 700 જેટલા વિદેશી ખરીદદારો હાજર રહેશે.

દેશના સૌથી મોટા ફાર્મા એક્સપોર્ટ પ્રદર્શન બાબતે આઇફેક્સના ચેરમેન વિજય શાહે જણાવ્યું હતું કે ગાંધીનગર ખાતે આ પ્રદર્શનનું ખાસ આયોજન કરવામાં આવ્યું છે. જેમાં 700થી વધુ વિદેશીઓ ગુજરાતના મહેમાન બનશે.આ એક ખાસ પ્રકારની બાયર સેલર મીટ છે. જ્યારે શરુઆતના સમયમાં અમે ફક્ત 800 જેટલા જ સ્ટોલ કરવાનું આયોજન કર્યું હતું, પરંતુ માંગ વધતાની સાથે 200 જેટલા વધુ સ્ટોલ્સ બનાવવાનું નક્કી કરવામાં આવ્યું હતું.

ફાર્મા એક્સપોર્ટમાં ભારત કુલ 35 ટકા ભાગ ધરાવે છે.ત્યારબાદ યુરોપ 15 અને આફ્રિકા 17 ટકા ભાગ ધરાવે છે. ગત વર્ષે ભારતે 11%ના ગ્રોથ રેટ સાથે કુલ 19 અબજ યુએસ ડોલરનો વેપાર કર્યો હતો.જ્યારે આ વર્ષે 18 ટકા નફો થવાની પણ શકયતાઓ દર્શાવવામાં આવી હતી. આ પ્રદર્શનથી ભારત અને રાજ્યની નાની કંપનીઓને વૈશ્વિક પ્લેટફોર્મ મળે તથા ફાર્માસ્યુટિકલ અને હેલ્થકેડરને એક સાથે મંચ પર લાવવાનો મુખ્ય હેતુ છે.જ્યારે દેશની અમુક પોલિસીને કારણે એક્સપોર્ટ કરવામાં અનેક સમસ્યાઓનો સામનો કરવો પડે છે.આ બાબતે શાહે જણાવ્યું હતું કે અમને જે સમસ્યાઓનો સામનો કરવો પડી રહ્યો છે. આ બાબતે કેન્દ્ર સરકારને ધ્યાન દોરવામાં આવ્યું છે અને ટૂંક સમયમાં આ સમસ્યાઓનો નિકાલ કરવામાં આવશે.જ્યારે ગુજરાત ડ્રગ ફોર્મ્યુલેશન્સમાં મેન્યુફેક્ચરિંગ લેબોરેટરીઝમાં સતત મોખરે સ્થાન ધરાવે છે.જેથી ગુજરાતના ફાર્મા પ્રોડકટને વૈશ્વિક પ્લેટફોર્મ મળે તે મુદ્દાને ખાસ ધ્યાન આપવામાં આવી રહ્યુ છે. જ્યારે વિશ્વમાં ભારતમાંથી કાર્ડિઓ વાસ્ક્યુલર, એન્ટી ડાયાબિટીસ અને એન્ટી કેન્સર દવાઓ વિશ્વમાં નિકાસ કરવામાં આવે છે. જ્યારે મુંબઇ, દિલ્હી બાદ હવે ગાંધીનગરમાં દેશનુ સૌથી મોટું ફાર્મા પ્રદર્શન યોજવામાં આવશે.આ કાર્યક્રમમાં રાજ્યના મુખ્યપ્રધાન વિજય રૂપાણી પણ હાજરી આપશે.