વિધાનસભાગૃહમાં રાજ્યપાલ પ્રવચન શરૂ કરે તે પહેલાં જ કોંગ્રેસનો હોબાળો, રાજ્યપાલે ગૃહ છોડ્યું

ગાંધીનગર : આજે વિધાનસભાનુંં એક દિવસીય સત્ર મળ્યુ હતું. જેમાં રાજ્યપાલ દેવવ્રત આચાર્ય સંબોધન કરે તે પહેલાં જ કોંગ્રેસ પક્ષના તમામ ધારાસભ્યોએ CAAના વિરોધમાં પોસ્ટર દેખાડ્યા હતા. જેથી રાજ્યપાલ દેવવ્રત આચાર્ય સંબોધન છોડીને ગૃહમાંથી બહાર નીકળી ગયા હતાં.

વિધાનસભાના એક દિવસીય સત્રની શરૂઆત રાજ્યપાલના પ્રવચનથી શરૂ કરવાની હતી. પરંતુ, રાજ્યપાલના પ્રવચન ગૃહમાં શરૂ કરે તે પહેલાં જ કોંગ્રેસના ધારાસભ્યોએ ગૃહની અંદર જ વિરોધનો સુર ઉઠાવ્યો હતો.

કોંગ્રેસ પક્ષ દ્વારા તમામ પ્રકારનું અગાઉથી જ આયોજન કરવામાં આવ્યું હતું અને વિરોધ કઈ રીતે કરવો તે અંગેનું પણ આયોજન અગાઉની બેઠકમાં કરવામાં આવ્યું હતું, ત્યારે વિધાનસભા ગૃહની શરૂઆતના ગણતરીની સેકન્ડોમાં જ કોંગ્રેસે પોસ્ટર બતાવીને ગૃહમાં વિરોધનો સૂરએ લગાવ્યો હતો અને CAAનો વિરોધ ગૃહમાં પણ કર્યો હતો.

CAAના વિરોધમાં કોંગ્રેસના પોસ્ટરના કારણે રાજ્યપાલ દેવવ્રત આચાર્ય વિધાનસભા ગૃહમાં પોતાનું પ્રવચન શરૂ કરે તે પહેલા જ ગૃહ છોડવાની ફરજ પડી હતી અને તેઓ ગૃહમાંથી નીકળી ગયા હતા. ઉલ્લેખનીય છે કે કોંગ્રેસ દ્વારા બાળ મૃત્યુ, મહિલાઓ રોજગારી સહિતના મુદ્દે ગૃહમાં જ વિરોધ શરૂ કરવામાં આવ્યો હતો જેના કારણે રાજ્યપાલ પોતાનું પ્રવચન ટૂંકાવીને ગૃહ છોડીને રવાના થયા હતા.