વિધાનસભા ગૃહમાં ખેડૂતો દેવામાફી અંગેનો ખરડો પસાર થાય એ પહેલાં કોંગ્રેસના સભ્યો દ્વારા જય કિસાનના નારા લગાવવામાં આવ્યા હતા. હર્ષદ રિબડિઆએ ગૃહમાં સંબોધન કર્યુ હતું કે, "ગુજરાતના 83 હજાર 157 કરોડનું દેવું છે. રાજ્યમાં 7.06 ટકા કૃષિ દર જોવા મળી રહ્યો છે, ખેડૂતોના દેવા માટે સરકાર જવાબદાર છે. કેન્દ્ર સરકાર ખેડૂતોની બમણી આવકની વાતો કરે છે પણ સરકાર ખેડૂતોને સિંચાઈ નું પાણી, પૂરતી વીજળી આપતી નથી. ભાજપની સરકાર છેલ્લા 20 વર્ષથી છે. તેમાં એક પણ ડેમ બાંધ્યા નથી હોવાનું ગૃહમાં નિવેદનો કરે છે. તો ખેડૂતોને પોષણક્ષમ ભાવ આપવામાં સરકાર શા માટે નિષ્ફળ નીવડી રહી છે."
હર્ષદ રિબડીયાના પ્રશ્નનો જવાબ આપતા રાજ્યના નાયબ મુખ્યપ્રધાન નિતીન પટેલે ગૃહમાં જણાવ્યું હતું કે, "હર્ષદ રીબડિયાનું ખાનગી વિધેયક છે અને તેમાં વિક્રમ માડમે પોતાની વાત રજૂ કરી, પણ કોંગ્રેસને ધિરાણ અને દેવા વચ્ચેનો ફરક ખબર પડવો જોઈએ. વિક્રમ માડમનો આભાર માનું છું. અગાઉ યુપીએ સરકારે 72 હજાર કરોડનું દેવું માફ કર્યુ. તેમ છતાં કિસાન દેવાદાર છે તેવું તેમણે જ કહ્યું છે. દેવું માફ કર્યા પછી પણ યુપીએની સરકાર જ હતી. જો કે, એ પછી તેની આનુષંગિક કાર્યવાહી ન થઈ એટલે હજુ પણ ખેડૂતો દેવાદાર છે. ખેડૂતો દેવાદાર છે તેના પર પીન કેટલાંક લોકોની ચોંટી ગઈ છે. પણ સૌ પહેલાં કોંગ્રેસે ધીરાણ શું અને દેવું શું ? તે તફાવત જાણવો જોઈએ. કોંગ્રેસ ભારત અને ગુજરાતના ખેડૂતોને દેવાદાર કહીને ખેડૂતોને બદનામ કરે છે. ત્યારે મધ્ય પ્રદેશ, રાજસ્થાન વગેરે જગ્યાએ તેમજ લોકસભા ચૂંટણી પહેલાં આ અભિયાન ચલાવ્યું હતું પણ કોંગ્રેસ નિષ્ફળ નીવડી હતી.
નીતિન પટેલે છેલ્લા 5 વર્ષમાં ખેડૂતોએ લીધેલ લૉન અને તરત કરેલ લૉન અંગે જાણકારી આપતા જણાવ્યું હતું કે, વર્ષ 2014-15માં 89.60 ટકા, વર્ષ 2015-16માં 95.87 ટકા, વર્ષ 2016-17માં 95.46 ટકા, વર્ષ 2017-18માં 94.61 ટકા અને વર્ષ 2018-19માં 95.70 ટકા ખેડૂતોએ લોનની ભરપાઈ કરી છે. આટલી લોન પરત કરે એ ખેડૂતો દેવાદાર કેવી રીતે હોય ? જેવા અનેક પ્રશ્નો ગૃહમાં કોંગ્રેસને કર્યા હતા.
વિધાનસભા ગૃહનો સમય પૂરો થયાં બાદ કોંગ્રેસે વધુ સમયની માંગ કરી હતી, પણ શાસક પક્ષ દ્વારા સમયના વધારો કરાયો નહોતો. એટલે કોંગ્રેસના ધારાસભ્યોએ પોસ્ટર સાથે ગૃહમાંથી બહાર આવીને વિધાનસભા સંકુલમાં રાજ્ય સરકાર વિરૂદ્ધ સૂત્રોચ્ચાર કર્યા હતા. તેમજ રાજ્ય સરકાર ખેડૂત વિરોધી સરકાર હોવાના પણ નિવેદન કર્યા હતાં.
