ગાંધીનગર સિવિલ કમ્પાઉન્ડમાં આવેલી પ્રધાનમંત્રી જન ઔષધી સ્ટોર સમયમર્યાદા સુધી ચાલુ રાખવામાં નહીં આવતા જાગૃત નાગરિક મેહુલ તુવર દ્વારા સીએમ પોર્ટલમાં ફરિયાદ કરવામાં આવી છે. જેમાં જણાવ્યું છે કે સરકારી મેડિકલ કોલેજ સંલગ્ન હોસ્પિટલમાં આવેલા પ્રધાનમંત્રી જન ઔષધી સ્ટોર 24×7 સમયમાં ખુલ્લો રાખવાનો હોય છે. જ્યારે જિલ્લાકક્ષાની હોસ્પિટલમાં 16 કલાક, જ્યારે સામુહિક આરોગ્ય કેન્દ્ર ઓપીડી ના સમયે કાર્યરત હોવો જરૂરી છે. સર્જીકલ આઈટમ OTC Product અને FMCG ઉપલબ્ધ કરાવવાની સંપૂર્ણ જવાબદારી એચએલએલ કંપનીની છે.
એચ એલ એલ કંપનીના ડેપ્યુટી જનરલ મેનેજરને આગામી સાત દિવસમાં આ બાબતે પૂરો અહેવાલ રજૂ કરવા ગુજરાત મેડીકલ સર્વિસ કોર્પોરેશન દ્વારા નોટિસ આપવામાં આવી છે. ગાંધીનગર સિવિલ હોસ્પિટલમાં આવેલ જન ઔષધી સ્ટોર માત્ર દેખાડા પૂરતો જ ઊભો કરવામાં આવ્યો હોય તેવું જોવા મળી રહ્યું છે. સામાન્ય દવાઓ પણ સ્ટોરમાંથી મળતી નથી. જ્યારે સાંજે આઠ વાગ્યે તે પહેલા જ તેના પાટીયા પાડી દેવામાં આવે છે. સરકારે જે ઉદ્દેશ સાથે આ સ્ટોરનું શુભારંભ કર્યો હતો. તે ઉદ્દેશનું જ સ્ટોર ચલાવતા કંપનીઓ દ્વારા નિકંદન કાઢી દેવામાં આવ્યું હોય તેવું જોવા મળી રહી છે.
