ગાંધીનગરમાં કાર અને એક્ટીવા વચ્ચે અકસ્માત, એક્ટીવા ચાલકનું ઘટનાસ્થળે મોત

ગાંધીનગર: ગાંધીનગર શહેરના પહોળા રસ્તા ઉપર યુવાનો બેફામ વાહન ચલાવી રહ્યા છે. બુધવારે સવારે 11 વાગ્યાના અરસામાં ઘ-4 સર્કલ પાસે એક ટુ-વ્હીલર લઇને જતા આધેડને નેનો ચાલકે યુવાનને અટફેટે લીધો ગચો. આ ગમખ્વાર અકસ્માતમાં એક્ટીવા ચાલકનું ઘટનાસ્થળે જ મોત નિપજ્યું હતું.

મળતી માહિતી મુજબ ગાંધીનગર શહેરમાં ઘ-2 સર્કલ પાસે દાબેલીની લારી ચલાવતા 56 વર્ષીય રસિક કેશવલાલ પ્રજાપતિ પોતાના પરિવાર સાથે વાવોલમાં આવેલી શારદા એપાર્ટમેન્ટમાં રહીને ગુજરાન ચલાવી રહ્યા હતા. બુધવારના રોજ સવારે 11 વાગ્યાના અરસામાં પોતાના કામ અર્થે ઘ-૩ સર્કલ તરફથી ઘ-4 તરફ પોતાના ટુ વ્હીલર પર જઇ રહ્યા હતા, જે દરમિયાન પાછળથી આવી રહેલી નેનો કારે એક્ટીવા ચાલકને ટક્કર મારતા અકસ્માત સર્જાયો હતો.

કારની ટક્કર એટલી જોરદાર હતી કે, ટુ વ્હીલર ચાલક કારના આગળના કાચ ઉપર ટકરાઈને પાછળના ભાગે કૂદીને પટકાયા હતા. માથાના ભાગે ઇજાઓ થતા તેમનું ઘટનાસ્થળે જ મોત નિપજ્યું હતું. આ અંગે સ્થાનિકોએ જણાવ્યું હતું કે, કાર ચાલક પુરપાટ ઝડપે જઈ રહ્યો હતો, તેથી કારે એક્ટીવા સવારને ટક્કર મારતા એક્ટીવા સવારનું મોત થયું હતું. આ બનાવની જાણ સેકટર 7 પોલીસને થતા ઘટનાસ્થળે પહોંચી સમગ્ર વિગતો મેળવાને આગળની કાર્યવાહી હાથ ધરી હતી. બીજી તરફ આરોપી કારચાલકને પણ પોલીસે ઝડપી લીધો હતો.