દેવભૂમિ દ્વારકા જિલ્‍લામાં કોરોના રસીકરણનો પ્રારંભ કરાવતા સાંસદ પૂનમ માડમ

સાંસદ પૂનમબેન માડમે ખંભાળીયાની જનરલ હોસ્‍પિટલ ખાતેથી કોરોના રસીકરણ કાર્યક્રમનો શુભારંભ કરાવતા જણાવ્યું હતું કે, ભારતની વેકસીનની સમગ્ર વિશ્વમાં વિશ્વસનીયતા ખુબ વધારે છે. જેનો સકસેસ રેટ 97 ટકા જેટલો છે. આ વેકસીનની કોઇ આડઅસર થતી નથી જેથી વેકસીન લેવા બાબતે કોઇએ ગભરાવાની કે ડરવાની જરૂર નથી.

• રસીનો પ્રથમ ડોઝ ગ્રહણ કરતા જનરલ હોસ્પિટલના અધિક્ષક ડો. હરીશ મટાણી
• રાજ્યની કોરોના સ્થિતિનો ચિતાર રજૂ કરતી ટૂંકી ડોક્યુમેન્ટરીનું પણ આ પ્રસંગે પ્રસારણ કરાયું હતું
• વેકસીનની કોઇ આડઅસર થતી નથી જેથી વેકસીન લેવા બાબતે કોઇએ ગભરાવાની કે ડરવાની જરૂર નથી
  
  ખંભાળીયાઃ પૂનમ માડમે વધુમાં જણાવ્યું કે ભગવાન દ્વારકાધીશના આશિર્વાદથી આપણા જિલ્‍લામાં કોરોનાનું સંક્રમણ ખૂબ ઓછું છે. તેમણે છેલ્‍લા 8-10 માસથી રાતદિવસ જોયા વગર કોરોના મહામારીમાં સેવા બજાવી રહ્યા છે તેવા કોરોના વોરીયર્સને અભિનંદન પાઠવ્‍યાં હતાં. મહાનુભાવોના હસ્તે દીપપ્રાગટ્યથી કાર્યક્રમનો શુભારંભ થયો હતો.

• હરીશ મટાણીએ લીધો પહેલો ડોઝ

જનરલ હોસ્પિટલ ખાતે યોજાયેલા કોરોના રસીકરણનો પ્રથમ ડોઝ અધિક્ષક ડોક્ટર હરીશ માટાણીએ લીધો હતો. જનરલ હોસ્‍પિટલના અધિક્ષક ડો. હરીશ મટાણીએ સ્વાગત પ્રવચન તેમ જ ડો. જેઠવાએ આભારવિધિ કરી હતી. રસીકરણના શુભારંભ પ્રસંગે વડાપ્રધાન નરેન્દ્ર મોદીના પ્રવચનમાં સૌ સહભાગી થયાં હતાં. તેમજ રાજ્યની કોરોના સ્થિતિનો ચિતાર રજૂ કરતી ટૂંકી ડોક્યુમેન્ટરીનું પણ આ પ્રસંગે પ્રસારણ કરાયું હતું.

ખંભાળીયાની જનરલ હોસ્‍પિટલ ખાતેથી કોરોના રસીકરણ કાર્યક્રમનો શુભારંભ

આ કાર્યક્રમમાં જિલ્‍લા ભાજપ પ્રમુખ ખીમભાઇ જોગલ, જિલ્‍લા પંચાયત પુર્વ પ્રમુખ પી.એસ. જાડેજા, કલેકટર ડો. નરેન્‍દ્રકુમાર મીના, જિલ્‍લા વિકાસ અધિકારી ડી.જે. જાડેજા, જિલ્‍લા ભાજપ મહામંત્રી મયૂરભાઇ ગઢવી, નગરપાલિકા પ્રમુખ શ્વેતાબેન શુકલ, જિલ્‍લા આરોગ્‍ય અધિકારી પટેલ, તેમ જ જિલ્‍લાના આરોગ્‍ય વિભાગના અધિકારી કર્મચારી વગેરે ઉપસ્‍થિત રહ્યાં હતાં.