અંધજન શાળા શિવારીમાળા પ્રજ્ઞા મંદિર ખાતે વિશ્વ વિકલાંગ દિવસની ઉજવણી કરવામાં આવી હતી. અંધજન શાળાના બાળકોને વિકલાંગ હોવા છતાં જે લોકોએ મહાન કાર્યો કર્યા છે. તેવા મહાન વીરલાઓ જેમ કે,સ્ટીફન હોકીંગ, હેલન કેલર, ટોમ ક્રુઝ, અરૂણિમા સિંહા, રવિન્દ્ર જેન, સુધા ચંદ્રન વિશેની શોર્ટ ફિલ્મ બતાવવામાં આવી હતી. આ કાર્યક્રમમાં દિવ્યાંગો અને વિકલાંગ બાળકો દ્વારા બાળગીત, તેમજ મહાન વિભૂતિઓના પ્રેરક પ્રસંગો પ્રસ્તુત કરવામાં આવ્યા હતા. અંધજન શાળાના આચાર્ય સુરેશ ભોયે આંતરરાષ્ટ્રીય વિશ્વ વિકલાંગ દિવસની સમજણ આપી હતી. ત્યારે કોડિનેટર કૌશિકભાઇ જોશીએ બાળકોને ખુબ આગળ વધવા આહ્વાન કર્યું હતું.
આ પ્રસંગે સમાજ સુરક્ષા અધિકારી જીગ્નેશ ચૌધરીએ જણાવ્યું હતું કે, વિકલાંગતા ધરાવતા લોકો વિશે સમાજમાં સમજણ વધે તેમના પ્રશ્નો વિશે સંવેદનશીલતા વધે તેમજ તેમના ગૌરવ અધિકારો અને સુખાકારી માટે સમાજને સમર્થન મળે એ હેતુથી વિશ્વ વિકલાંગ દિવસની ઉજવણી કરવામાં આવે છે. વિકલાંગતા ધરાવતા બાળકોને યુનિક વિકલાંગતા આઈ. ડી .કાર્ડ આપવામાં આવ્યા હતા.
આ પ્રસંગે બાળ સુરક્ષા અધિકારી ગૌરવ જોશી, શાળાના શિક્ષક ભાઈઓ અને બહેનો તેમજ મોટી સંખ્યામાં વિદ્યાર્થીઓ હાજર રહ્યા હતા.
