ડાંગ : ડાંગ જિલ્લાના આહવા તાલુકામાં સમાવિષ્ટ અને દક્ષિણ વનવિભાગ હસ્તકની ચિખલી રેન્જમાં લાગુ મહારાઈચોંડ ગામના બે આદિવાસી ઈસમોમાં 50 વર્ષીય કાળુભાઈ ગાવિત તેમજ 40 વર્ષીય મહેશભાઈ સયાજીભાઈ મહાલા જે બંને ગુરુવારે 6:30 વાગ્યાના અરસામાં જ કોઈક ખેડૂતના માલિકીના ઝાડો કાપવા માટે જંગલ વિસ્તારમાં આવેલા ખેતરમાં જઈ રહ્યા હતા. જે દરમિયાન મહારાઈચોંડ ગામના પાદરે આવેલા ફોરેસ્ટ ચેકિંગ નાકા વિસ્તારના જંગલના પગદંડી માર્ગમાં અચાનક ખૂંખાર દીપડો નીકળી આવ્યો હતો અને માર્ગમાં આ બન્ને ઈસમો તથા ખૂંખાર દીપડાનો સામે ભેટો થઇ જતાં ઘટનાસ્થળે આ બંને ઈસમોમાં કાળુભાઈ ગાવિત તેમજ મહેશભાઈ મહાલા ઉપર તૂટી પડી જાનલેવા હુમલો કરી તેમના શરીરના ભાગે ગંભીર ઈજાઓ પહોંચાડી હતી.
આ ઘટના સ્થળેથી આ બન્ને ઇજાગ્રસ્ત ઈસમોએ પોતાનો જીવ બચાવી ગામમાં આવ્યા હતા. જે બાદ પંથકમાં ભયનો માહોલ ઉભો થવાની ચકચાર મચી ગયો હતો. દીપડાના હુમલામાં ઇજાગ્રસ્ત બનેલા આ બે ઇસમોનો જીવ બચી જતા તેઓને તાત્કાલિક સારવારના અર્થે નજીકની શામગહાન સી.એચ.સી. ખાતે ખસેડવાની તજવીજ હાથ ધરાઈ હતી.
આ બનાવ બાબતે દક્ષિણ વિભાગમાં સમાવિષ્ટ ચિખલી રેંજના આર.એફ.ઓ સરસ્વતીબેન ભોંય જોડે ટેલિફોનિક વાતચીત કરતા જણાવ્યું હતું કે, મહારાઈચોંડ ગામના બે ઈસમોએ વહેલી સવારે માલિકીના કામ અર્થે જંગલ વિસ્તારમાં નીકળ્યા હતા, અહીં જંગલ વિસ્તારમાં દીપડા ના રોજના આવન-જાવન રસ્તામાં આ બન્ને ઈસમો ભટકાઈ જતા દીપડાએ હુમલો કરી ઈજા પહોંચાડી હતી. ચિખલી રેંજના ગામડાઓમાં આ દીપડો ઘૂસીને હુમલો કરતો હોય તેવા કોઈ કિસ્સા બન્યો નથી. છતાંયે લોકોની સુરક્ષાને ધ્યાનમાં રાખી આ દીપડાને પકડવા માટે બે સ્થળોએ પાંજરા ગોઠવી દીપડાને પકડવાની કવાયત હાથ ધરવામાં આવી છે.
મહારાઈચોંડ ગામના ઇજાગ્રસ્ત ઈસમ કાળુભાઇ જોડે વાત કરતા તેમને જણાવ્યું હતું કે, વહેલી સવારે કામે જતા અચાનક દીપડાએ તેમના સાથી મહેશભાઈ ઉપર હુમલો કર્યો હતો. તેમને બચાવવા જતા ખુંખાર દીપડો કાળુભાઈ પર ત્રાટક્યો હતો. સદનસીબે તેમના જોડે તેમનો વફાદાર કૂતરો હોવાના કારણે કૂતરાએ દીપડા પર હુમલો કરવાનો પ્રયાસ કર્યો, જેના કારણે દીપડો જંગલમાં નાસી ગયો હતો.
