ડાંગ: ઝાવડા ગામે ખુંખાર દિપડાએ બળદનું મારણ કર્યું

ડાંગ જિલ્લો જંગલ વિસ્તારથી સમૃદ્ધ છે. ડાંગ જિલ્લાના જંગલોમાં વ્યાપક પ્રમાણમાં વન્ય જીવો વસવાટ કરે છે. આ વન્ય જીવો અવારનવાર રહેણાંક વિસ્તારમાં આવી જવાના કિસ્સા સામે આવે છે, જ્યારે શુક્રવારે વધઈ તાલુકામાં સમાવિષ્ટ ઝાવડા ગામમાં દીપડાએ સ્થાનિક પશુપાલકનાં બળદનું મારણ કર્યું હતું.

ડાંગ: જિલ્લાનાં વધઈ તાલુકામાં સમાવિષ્ટ ઝાવડા ગામમાં દીપડાએ સ્થાનિક પશુપાલકનાં બળદનું મારણ કરતા ભયનો માહોલ સર્જાયો છે.

પ્રાપ્ત વિગતો અનુસાર ડાંગ જિલ્લાનાં વઘઈ તાલુકામાં સમાવિષ્ટ ઝાવડા ગામમાં બે ત્રણ દિવસ પૂર્વે 5 કલાકના અરસામાં શિકારની શોધમાં આમ તેમ ભટકતો ખુંખાર દીપડો અચાનક જ ગામમાં પ્રવેશ્યો હતો.

આ ખુંખાર દીપડાએ ઝાવડા ગામનાં પશુપાલક નામે મનસ પવારનાં ઘરમાં બાંધેલો એક ખેતી લાયક બળદનું મારણ કરતા ગ્રામજનોમાં ભયનો માહોલ ફેલાઈ ગયો છે. આ બનેલા ઘટનાની જાણ પશુપાલક દ્વારા નજીકનાં રાઉન્ડ ફોરેસ્ટ ઓફિસ, ચિકાર ખાતે કરતા આગળની કાર્યવાહી હાથ ધરી હતી.

ગ્રામજનોનાં જણાવ્યા અનુસાર, આ ખુંખાર દીપડાની ગામ નજીક રોજેરોજ ચહલ પહલ ચાલુ થઈ છે, ત્યારે આ ગામનાં લોકોને સાંજ પડે એના પહેલા ઘરનાં દરવાજા બંધ કરવા પડે છે. જેથી વન વિભાગ હાલમાં લોકો અને પાલતુ પશુઓની સુરક્ષાને ધ્યાનમાં રાખી પાંજરા ગોઠવી, આ દીપડાને પકડી અન્યત્ર દુરનાં જંગલોમાં છોડે તેવી લોક માગ ઉઠી છે.