સિદ્ધિ તેને જઈ વરે જે પરસેવે નાહ્ય. આ ઉક્તિ આજે થોરપાડા ગામના અવિરાજ ચૌધરીએ સિદ્ધ કરી બતાવી છે. સામાન્ય ખેડૂત પરિવારમાંથી આવતો અવિરાજે દિલ્હી IITમાં પ્રવેશ મેળવ્યો છે. દેશની સર્વોચ્ચ એન્જીનીયરીંગ ક્ષેત્રે લેવાતી પરીક્ષામાં 1020મો ક્રમાંક મેળવીને દેશની નામાંકિત IIT દિલ્હી ટેક્સટાઈલ ટેકનોલોજીમાં પ્રવેશ મેળવ્યો છે. નાનપણથી જ ભણવામાં હોશિયાર અવિરાજે પ્રાથમીક શિક્ષણ પોતાના ગામમાં જ લીઘું હતું. ત્યારબાદ માધ્યમિક અને ઉચ્ચતર માધ્યમિક શિક્ષણ સંતોકબા વિદ્યામંદિર માલે ગામમાં લીધું હતું.
અવિરાજના પરિવારમાં કુલ 11 ભાઈ-બહેનો છે. વિશાળ પરિવારમાં અવિરાજ સૌથી નાનો છે. પરિવારની આર્થિક પરિસ્થિતિ સારી ન હોવા છતાં પણ તેમના માં બાપે પોતાના બાળકોને તરછોડ્યા નહિ. બાળકોના ઉજ્જવળ ભવિષ્ય માટે આગળ વધવાની છૂટ આપી અને તેનું જ પરિણામ અવિરાજ કહી શકાય. ધોરણ 10માં જિલ્લામાં પ્રથમ ક્રમાંક મેળવનાર અવિરાજમાં વધુ ઉચ્ચ શિક્ષણ મેળવવાની મહેચ્છા જાગી. શાળામાં શિક્ષકોના માર્ગદર્શન મેળવી પોતાનો ધ્યેય નક્કી કર્યો હતો. પોતાના ધ્યેયને પ્રાપ્ત કરવા માટે તનતોડ મહેનત કરીને દિલ્લી જેવી ઉચ્ચ શિક્ષણ સંસ્થામાં પ્રવેશ મેળવ્યો છે. જે ડાંગના ઇતિહાસમાં પ્રથમ ઘટના છે.
માલેગામ વિદ્યામંદિરના ગુરુ પી .પી સ્વામી અવિરાજ ચૌધરી વિશે કહ્યુ કે, અવિરાજ દરેક વિદ્યાર્થીઓ માટે પ્રેરણા રૂપ છે. સામાન્ય પરિવારમાંથી આવતાં વિદ્યાર્થીઓ પણ ઉચ્ચ શિક્ષણ મેળવી પ્રગતિ કરવા લાગ્યા છે. અવિરાજની આ સિદ્ધિ બદલ અવિરાજના પરિવામાં ખુશીનો માહોલ જોવા મળી રહ્યો. ઘરની પરિસ્થિતિ સારી ન હોવા છતાં પણ અવિરાજના ઉજ્જવળ ભવિષ્ય માટે તેમના માબાપ અને ભાઈ બહેન ખૂબ જ સપોર્ટ કરી રહ્યા છે.
ડાંગ જિલ્લામાંથી દિલ્હી IITમાં પ્રવેશ મેળવનાર અવિરાજ ચૌધરી ETV BHARAT ભારત સાથે વાત કરતા જણાવ્યુ કે, ડાંગ ને ભારતના પછાત જિલ્લાઓમાં ગણવામાં આવે છે. પરંતુ હવે ડાંગના વિદ્યાર્થીઓ ઉત્તરોઉતર પ્રગતિ કરી રહ્યા છે. સારું શિક્ષણ પ્રાપ્ત કરીને વિદ્યાર્થીઓ આગળ વધી રહ્યા છે. અવિરાજ ભણીગણીને ડાંગના લોકોને આગળ લાવવામાં મમદરૂપ બનવાની ઈચ્છા ધરાવે છે.
