રાજ્ય ચૂંટણી કમિશ્નર સંજય પ્રસાદે સંવિધાનથી સમરસતા કાર્યક્રમને ખુલ્લો મુકતા જણાવ્યું હતું કે, ડાંગનો સાંસ્કૃતિક વારસો સમૃધ્ધ છે. ભારતના ઈતિહાસમાં ડાંગ ગૌરવનું સ્થાન ધરાવે છે. અહીંની ખમીરવંતી પ્રજા બ્રિટીશ સરકાર અંગ્રેજોને પરાસ્ત કરતી અને ત્યારથી આઝાદી ધરાવે છે. આદિવાસી પ્રજા એકસાથે રહી સુંદર સામાજીક વ્યવસ્થા ધરાવે છે. ગુજરાતમાં ૧૯૬૦થી પંચાયત ધારો અમલમાં આવ્યો પરંતુ સંવિધાનમાં ૧૯૯૨ પછી રાજ્ય ચૂંટણી આયોગ અસ્તિત્વમાં આવ્યું. જેમાં ગ્રામ પંચાયત,તાલુકા,જિલ્લા પંચાયતોમાં વહીવટ સુદ્રઢ બન્યો. સ્થાનિક સ્વરાજમાં વિકાસના સારા કામો થાય છે.
રાજ્ય ચૂંટણી આયોગના સચિવ મહેશ જોષીએ જણાવ્યું હતું કે, આપણે ૨૬ નવેમ્બર સંવિધાનથી સમરસતા દિવસની ઉજવણી શરૂ કરી છે, જે ૧૪ એપ્રિલ સુધી ચાલુ રહેશે. આપણા બંધારણમાં આપણને અધિકારો મળ્યા છે. આપણે આપણી ફરજોને પણ અદા કરીએ. ડાંગ એક એવો પ્રેરક જિલ્લો છે, જ્યાં મહિલા સશક્તિકરણની કામગીરી પણ ખૂબ સારી છે. અહીંના બહેનો ખૂબ જ જાગૃત છે. સ્થાનિક સ્વરાજ્યની ચૂંટણીઓમાં મહિલાઓના મતદાનની ટકાવારી ઉંચી રહે છે. આપણે સૌ એ ભેગામળી લોકશાહીમાં કોઇપણ મતદાર મતદાનથી વંચિત રહી ન જાય તે માટે જાગૃત બનીએ.
જિલ્લા ચૂંટણી અધિકારી અને કલેકટર એન.કે.ડામોરે મહાનુભવોને આવકારતા જણાવ્યું હતું કે, ડાંગ જિલ્લો કુલ-૩૧૧ ગામ અને ૭૦ ગ્રામપંચાયત ધરાવે છે. અહીં મતદાન ટકાવારીમાં રાજ્યમાં બીજા નંબરે ડાંગ આવે છે. અગાઉની ચૂંટણીમાં ૮૧ ટકા જેટલું મતદાન નોંધાયું હતું, જ્યારે સ્થાનિક સ્વરાજ્યની ચૂંટણીઓમાં સરેરાશ ૯૦ ટકાથી વધુ મતદાન અહીં થાય છે. વધુમાં મતદાર જાગૃતિ અભિયાન દ્વારા 100 ટકા મતદાન થાય તેવો અનુરોધ તેમણે કર્યો હતો.
ગૌરાંગ જાની અને રીઝવાન કાદરીએ આઝાદીના ઈતિહાસ અને સંવિધાન અંગે પાયાની લોકશાહીમાં સ્થાનિક સ્વરાજ્યની સંસ્થાઓમાં લોકભાગીદારી અંગે વિસ્તૃત ચર્ચાઓ કરી હતી. રાજ્ય ચૂંટણી આયોગ દ્વારા સ્થાનિક સ્વરાજ્યની લધુ ફિલ્મ દર્શાવવામાં આવી હતી. ઉપસ્થિત તમામ લોકોએ બંધારણ આમુખનો સંકલ્પ લીધો હતો.ધુડા અને ચીંચલીના લોક કલાકારોએ તમાશા દ્વારા મતદાર જાગૃતિ સંદેશ આપ્યો હતો.
જિલ્લા વિકાસ અધિકારી એચ.કે.વઢવાણિયાએ રાજ્ય ચૂંટણી આયોગ સહિત તમામ મહાનુભાવોનો આભાર વ્યક્ત કર્યો હતો.આ પ્રસંગે જિલ્લા પંચાયત પ્રમુખ બીબીબેન ચૌધરી,વધઈ તાલુકા પંચાયત પ્રમુખ સંકેતભાઈ બંગાળ, આહવા સરપંચ રેખાબેન પટેલ, વાસુર્ણા રાજવી ધનરાજસિંહ સૂર્યવંશી,નિવાસી અધિક કલેકટર ટી.કે.ડામોર,પ્રાંત અધિકારી કાજલબેન ગામીત સહિત જિલ્લા ચૂંટણી તંત્રના અધિકારી અને કર્મચારીઓ અને પદાધિકારીઓ ઉપસ્થિત રહ્યા હતા.
