ડાંગઃ ગુજરાત રાજ્યના પ્રકૃતિ અભ્યાસુઓની સંશોધનાત્મક જિજ્ઞાસાઓને નિખાર આપવા માટે દક્ષિણ વનવિભાગના નેજા હેઠળ વઘઇ કિલાદ કેમ્પ સાઈડના સ્થળે બે દિવસીય બોટની ફેસ્ટિવલ 2020નું આયોજન કરવામાં આવ્યું હતું.
બે દિવસ માટે યોજાયેલા બોટની ફેસ્ટિવલ 2020 કાર્યક્રમમાં ગુજરાત રાજ્યની 18 બોટની કોલેજનાં 150થી વધુ વિદ્યાર્થીઓ સહિત માર્ગદર્શક તજજ્ઞો જોડાયા હતાં. અહીં, વિદ્યાર્થીઓએ સંશોધનાત્મક પ્રકલ્પ હેઠળ વિવિધ સ્ટૉલ પર વનસ્પતિ, પાંદડા, કંદમૂળ, જંગલી ફળ-ફળાદીમાંથી વિવિધ ફૂડ બનાવી ઉપસ્થિત પ્રકૃતિપ્રેમીઓ સમક્ષ રજૂ કરી સમાજને નવી પ્રેરણા પૂરી પાડી હતી.
ડાંગ જિલ્લામાં બોટની ફેસ્ટિવલ આયોજન કરવા માટેનો મુખ્ય ઉદ્દેશ્ય શહેરી વિદ્યાર્થીઓને પ્રાકૃતિક જંગલ વિશેની જાણકારી આપવાનો છે. હાલમાં આધુનિક યુગમાં શહેરી જીવન પ્રકૃતિથી દૂર રહેવા લાગ્યા છે. તેઓ પ્રકૃતિને ભૂલી ગયા છે. તેઓને પ્રકૃતિ તરફ પાછા વળી સમજણ આપવી જરૂરી બની ગયું છે.
કેમ્પમાં બોટની વિદ્યાર્થીઓને જ્ઞાન સાથે ગમ્મત થાય તે હેતુથી જુદી જુદી સંશોધનાત્મક પ્રવૃત્તિઓ કરાવવામાં આવી હતી. વિદ્યાર્થીઓને જંગલની પરિક્રમા કરાવી વનસ્પતિઓની ઓળખ કરાવવી, જંગલના સંપ્રદાયમાંથી વિવિધતમ વસ્તુઓ જે માનવજીવન માટે ઉપયોગી છે, તેમનો ઉપયોગ કરી જુદી-જુદી વસ્તુઓ બનાવી શકાય છે, તથા બોટની વિદ્યાર્થીઓ જ્યારે જંગલમાં જાય છે, ત્યારે જંગલની પેદાશો ઉપયોગ કરી શકે તે માટે તેની પ્રવૃત્તિઓના હકારાત્મક અભિગમને સાકાર કરવાની સમજ પૂરી પાડી હતી.
આ કાર્યક્રમમાં વલસાડ વન વિભાગનાં CCF એમ.જે પરમાર, DCF અગનેશ્વર વ્યાસ, DCF દિનેશભાઇ રબારી, વઘઇ રેંજ RFO ડી.કે.રબારી અને વનકર્મીઓ સહિત બોટની વિદ્યાર્થીઓ મોટી સંખ્યામાં ઉપસ્થિત રહ્યા હતાં.
