સુરત: જિલ્લાના માંગરોળ ખાતે આવેલી નવાપરા GIDCમાં એક મોટી દુર્ઘટના સામે આવી છે. બિસ્કિટ અને વેફર્સના પેકિંગ મટીરિયલ બનાવતી સિસ્કો કંપનીમાં અચાનક ભીષણ આગ ફાટી નીકળી હતી. આગે વિકરાળ સ્વરૂપ ધારણ કરતાં કંપનીમાં રહેલા કેમિકલ ભરેલા ડ્રમોમાં બ્લાસ્ટ થયો હતો, જેના કારણે પરિસ્થિતિ વધુ ગંભીર બની હતી.
6 કલાક બાદ આગ કાબૂમાં આવી: ઘટનાની જાણ થતાં જ સુમિલોન, કામરેજ, માંડવી, બારડોલી અને સુરત મહાનગરપાલિકાની ફાયર બ્રિગેડની ટીમો તાત્કાલિક ઘટનાસ્થળે દોડી આવી હતી. કંપનીમાં પતરાનો શેડ હોવાના કારણે આગ પર કાબૂ મેળવવામાં ફાયર ફાઈટર્સને ભારે મુશ્કેલીનો સામનો કરવો પડ્યો હતો. લગભગ 6 કલાક સુધી સતત પાણીનો મારો ચલાવ્યા બાદ આગ પર આંશિક નિયંત્રણ મેળવવામાં સફળતા મળી હતી.
આગનું ચોક્કસ કારણ જાણી શકાયું નથી: ફાયર ઓફિસર વિજય ટંડેલના જણાવ્યા મુજબ, આગની ગંભીરતાને જોતાં ફાયર વિભાગને બાજુના બિલ્ડીંગ પરથી કામગીરી કરવી પડી રહી છે. સલામતીના ભાગરૂપે વિસ્તારનો વીજ પુરવઠો બંધ કરી દેવામાં આવ્યો છે. આ દુર્ઘટનામાં કંપની માલિકને મોટું આર્થિક નુકસાન થયું છે. આગ લાગવાનું ચોક્કસ કારણ હજુ સુધી જાણી શકાયું નથી. ફાયર બ્રિગેડની ટીમો હજુ પણ ઘટનાસ્થળે હાજર રહી આગને સંપૂર્ણપણે કાબૂમાં લેવાની કામગીરી કરી રહી છે.
આ પણ વાંચો:
