ડાંગ: ગુજરાત રાજ્યમાં કોરોનાનાં કેસોનો આંકડો દિવસને દિવસે વધી રહ્યો છે. હાલ ગુજરાતમાં કોરોના પોઝિટિવ કેસોની સંખ્યા 14,468 છે. સાથે કોરોનાના કારણે મૃત્યુદરમાં પણ વધારો થઇ રહ્યો છે. કોરોનાના કારણે રાજ્યમાં 888 લોકોનાં મોત નીપજ્યાં છે. ત્યારે કોરોનાના કહેરમાં ગુજરાતના છેવાડે આવેલું એકમાત્ર ડાંગ જિલ્લા સિવાય તમામ જિલ્લાઓ કોરોનાગ્રસ્ત બન્યા છે. ડાંગ જિલ્લામાં નોંધાયેલ 3 પોઝિટિવ કેસો રિકવર થઇ જતા ડાંગ જિલ્લો કોરોના મુક્ત જિલ્લો બન્યો છે.
ગુજરાત રાજ્યના છેવાડે આવેલું ડાંગ જિલ્લો જ્યાં આદિવાસીઓની સૌથી વધુ વસતી જોવા મળે છે. આ જિલ્લામાં લગભગ 25 દિવસ પહેલા 3 પોઝિટિવ કેસો સામે આવ્યા હતા. જે ત્રણેય કેસો સુરત સાથે સંબંધ ધરાવતી નર્સ યુવતીઓ હતી. ડાંગ જિલ્લામાં 25 દિવસ અગાઉ કોરોનાનાં પોઝિટિવ કેસ સામે આવતા જ તંત્રએ તાત્કાલિક ધોરણે કોરોના પોઝિટિવ કેસોને સી.એચ.સી કોવિડ કેર સેન્ટરમાં આઇસોલેટ કરવામાં આવ્યા હતા.
અહી 14 દિવસ બાદ આ યુવતીઓનો રિપોર્ટ નેગેટીવ આવતા અને તેઓ સંપૂર્ણ સ્વસ્થ જણાતા તેઓને રજા આપવામાં આવી હતી. જો કે આ ત્રણેય યુવતીઓનો રિપોર્ટ કોરોના પોઝિટિવ હોવા છતાં તેઓમાં કોઇ પણ કોરોનાનાં પોઝિટિવ ચિહ્નો દેખાયા ન હતા. છતાં તકેદારીનાં ભાગરૂપે ડાંગ વહીવટી તંત્ર દ્વારા કોરોના પોઝિટિવ યુવતીઓનાં રહેણાંકની આસપાસનો 3 કિ.મિનાં ત્રિજ્યામાં આવતા વિસ્તારને કન્ટેન્ટમેંટ વિસ્તાર જાહેર કરવામાં આવ્યો હતો.
આ વિસ્તારોમાં આરોગ્ય વિભાગ દ્વારા ડોર ટુ ડોર જઇને સર્વે કરવામાં આવ્યો હતો. જેમાં એકપણ શંકાસ્પદ કે પોઝિટિવ કેસ સામે આવ્યો ન હતો. સાથે આ વિસ્તારમાં લગભગ છેલ્લા 20 દિવસથી એકપણ સેમ્પલ મોકલવામા આવ્યું નથી. જિલ્લામાં કુલ અત્યાર સુધીનાં 677 સેમ્પલો સુરત મેડિકલ કોલેજ ખાતે મોકલવામા આવ્યા હતા. જેમાંથી 651 વ્યક્તિઓનાં રિપોર્ટ નેગેટીવ તેમજ અન્ય 23 રિપોર્ટ હાલમાં પેન્ડીંગમાં છે.
આ ઉપરાત જિલ્લા બહારથી આવનાર લોકોને આરોગ્ય વિભાગ દ્વારા હોમ કોરોન્ટાઈનની સલાહ આપવામાં આવે છે. જેમાં હાલમાં 335 વ્યક્તિઓ કોરોન્ટાઈન પિરીયડમાં છે. જ્યારે 1323 વ્યક્તિઓનો કોરોન્ટાઈન પિરીયડ પૂરો થયો છે. અને તમામને રજા અપાઈ છે.
ગુજરાત રાજ્યમાં જ્યારે કોરોનાના કેસોમાં રોજેરોજ ભયાવહ રીતે વધારો થઇ રહ્યો છે. સાથે જ મૃત્યુઆંકમાં પણ વધારો થઇ રહ્યો છે. ત્યારે ડાંગ જિલ્લામાં કલેક્ટર એન.કે.ડામોરનાં સહયોગથી એકપણ પોઝિટિવ કેસ હાલમાં જિલ્લામાં નથી. તેમજ ડાંગ જિલ્લામાં નોંધાયેલ પોઝિટિવ કેસોના કારણે પણ કોઈ પણ સ્થળે સંક્રમણ ન ફેલાતા જિલ્લો કોરોનામુક્ત બન્યો છે.
