પોલીસના બંદોબસ્તથી મેળાના રાહદારીઓ પરેશાન, એક કિલોમીટર સુધી ચાલીને જવા લોકો મજબૂર

વાપી સેલવાસ માર્ગ પર 50થી વધારે વર્ષોથી ભરાતો લવાછાનો મેળો આ વિસ્તારના લોકો માટે 5 દિવસનો અનોખો ઉત્સવ છે. આ મેળો મુખ્ય માર્ગ પર ભરાતો હોય છે. દર વર્ષે સેલવાસ પોલીસ અને વલસાડ પોલીસ દ્વારા ચુસ્ત બંદોબસ્ત ગોઠવવામાં આવે છે. જેમાં આ વખતે સેલવાસ પોલીસે મેળામાં આવતા લોકોના વાહનનોને એકાદ કિલોમીટર દૂર જ થોભાવી પગપાળા જવાનું ફરમાન કાઢતા બાળકો સાથે આવતા લોકો પરેશાનીનો સામનો કરી રહ્યા છે. જ્યારે કેટલાક લોકો મેળાની મોજ માણ્યા વિના જ પરત ફરી રહ્યાં છે.

દમણઃ લવાછા ગામની બંને તરફ સંઘપ્રદેશ સેલવાસની સરહદ છે. એટલે મેળામાં વચ્ચોવચ્ચ ગુજરાત પોલીસ ચુસ્ત પોલીસ બંદોબસ્ત ગોઠવી પોતાની ફરજ નિભાવે છે. એ જ રીતે સેલવાસ પોલીસ મેળાના છેડે પોતાની ફરજ બજાવે છે. પરંતુ સેલવાસ પોલીસે મેળામાં આવતા લોકોના વાહનોને મેળાના મુખ્ય સ્થળથી એક કિલોમીટર દૂર જ બેરીકેટ લગાવી લોકોને પગપાળા જવાની ફરજ પાડી છે. જેથી મેળામાં બાળકો સાથે આવતા પરિવારો મુશ્કેલીમાં મૂકાયા છે.

સેલવાસ પોલીસના આ કદમથી સ્થાનિક રહીશોને મુશ્કેલીનો સામનો કરવો પડી રહ્યો છે. તેઓ પણ પોતાના વાહનો લઈ જઈ શકતા નથી. લોકોએ બળાપો કાઢ્યો હતો કે, જે જગ્યાએ પોલીસે બેરીકેટ લગાવ્યા છે. તે દાદરા ગામથી દાદરા ગાર્ડન સુધી મેળાના કોઈ મોટા સ્ટોલ નથી. આ એરિયા વાહન ચાલકોના પાર્કિંગ માટે ફાળવવામાં આવતો હતો. પરંતુ આ વખતે તે બંધ કરી દીધો છે એટલે 2થી અઢી કિલોમીટર લાંબા મેળામાં હવે આ એકાદ કિલોમીટર ફોગટનું ચાલવું પડે છે.