મુંબઈ : પ્રખ્યાત શો તારક મહેતા કા ઉલ્ટા ચશ્માના લાખો ચાહકો છે, પરંતુ સૌથી વધુ ચાહકો આ શોના પાત્ર દયા બેનના છે. આ પાત્ર દિશા વાકાણીએ ભજવ્યું છે, પરંતુ પોતાના અંગત જીવનમાં વ્યસ્ત હોવાને કારણે દયા બેન ઘણા વર્ષોથી શોમાંથી ગાયબ છે. હાલમાં જ દિશા વાકાણીની વાપસીને લઈને સમાચાર સામે આવ્યા છે.
વર્ષોથી ગાયબ દયાબેનનો ક્રેઝ યથાવત : તારક મહેતા કા ઉલ્ટા ચશ્માના દયાબેનનું પાત્ર ભજવતા દિશા વાકાણી ઘણા વર્ષોથી શોમાંથી ગાયબ છે. દર્શકો હજુ પણ તેમની વાપસીની રાહ જોઈ રહ્યા છે. દયા બેનનો ક્રેઝ એટલો બધો છે કે મેકર્સે આ રોલ માટે અન્ય કોઈનો સંપર્ક પણ કર્યો નથી. પરંતુ આજે અમે તમને જણાવવા જઈ રહ્યા છીએ કે શું દયા ભાભી આ શોમાં પરત ફરશે કે નહીં.
અસિત મોદીએ કહ્યું દયાબેન પરત....
દયા ભાભીની વાપસી વિશે વાત કરતા શોના નિર્માતા અસિત મોદીએ તાજેતરમાં કહ્યું કે, 'અમે પણ દયાબેનને પાછા લાવવા માંગીએ છીએ, કારણ કે દર્શકોની સાથે અમે પણ દયાબેનને ખૂબ જ મિસ કરી રહ્યા છીએ. દરમિયાન દયાબેન શોમાં પાછા ફરશે કે નહીં તે અટકળો વિશે અસિત મોદીએ કહ્યું, 'હું હજુ પણ દિશા વાકાણી જીને શોમાં પરત લાવવાનો પ્રયાસ કરી રહ્યો છું, પરંતુ હું માનું છું કે હવે તેમના માટે પરત આવવું થોડું મુશ્કેલ છે. તે હવે બે બાળકોની માતા છે. હું તેમના પરિવારની ખૂબ નજીક છું. અમે 17 વર્ષ સાથે કામ કર્યું, તે મારી બહેન જેવી છે અને મને રાખડી પણ બાંધી. પરંતુ હવે તેમના માટે શોમાં પરત આવવું મુશ્કેલ છે. પરંતુ હજુ પણ હું આશા રાખું છું કે કોઈ ચમત્કાર થાય અને દિશા શોમાં પરત ફરે. પણ જો એવું નહીં બને તો બીજી દયા બેનને લાવવી પડશે.
શું નવા દયાબેન આવશે ? તમને જણાવી દઈએ કે દિશા વાકાણીએ લગ્ન બાદ બ્રેક લીધો હતો, પરંતુ તે શોમાં પાછી આવી હતી. બાદમાં અભિનેત્રી પોતાની પ્રથમ પુત્રીને જન્મ આપ્યા બાદ બ્રેક પર ગઈ, પરંતુ શોમાં પરત ફરી શકી ન હતી. કોવિડ પહેલા, આશા જાગી હતી અને તેમણે નિર્માતાઓ સાથે વાત પણ કરી હતી. પરંતુ લોકડાઉન પછી, તેમણે બીજી પુત્રીને જન્મ આપ્યો. દર્શકોમાં ઘણી નિરાશા છે કે તેમની પ્રિય દયા બેન લાંબા સમયથી શોથી દૂર છે. હવે એવું લાગે છે કે દિશા પરિવાર સાથે સમય પસાર કરવા માંગે છે અને આવી સ્થિતિમાં મેકર્સ નવી દયાની શોધ કરશે.
