શુક્રવારે દમણ-દીવના સાંસદ લાલુ પટેલે વડાપ્રધાન મોદી સાથે શુભેચ્છા મુલાકાત યોજી હતી. આ મુલાકાતમાં સાંસદે દમણ-દીવની જનતા અને BJP પક્ષને જંગી બહુમતથી ચૂંટણી જીતવા બદલ અભિનંદન પાઠવ્યા હતા.
લાલુ પટેલે વડાપ્રધાન સાથે પોતાના મતવિસ્તાર સંબંધિત વિવિધ મુદ્દા પર ચર્ચા-વિચારણા કરી હતી. જેમાં દીવના ખેડૂતો માટે પોર્ટુગીઝ સમયની ખેતીની જમીન અંગે ચર્ચા કરી સરકાર આ જમીન સ્થાનિક ખેડૂતોને સુપ્રત કરે તેવી રજૂઆત કરી હતી.
આ ઉપરાંત લાલુ પટેલે દમણ દીવ સાથે દાદરા અને નગર હવેલીના પ્રશાંસનિક એકીકરણ અંગે પણ રજૂઆત કરી હતી. જેમાં વડાપ્રધાન મોદીએ દમણ-દીવની જનતાની ચિંતા વ્યક્ત કરી હતી. સાથે જ આશ્વાસન આપ્યું હતું કે, આ એકીકરણમાં તમામ મુદ્દા પર વિશેષ ધ્યાન આપીને પ્રાથમિક મૂલ્યોને સમજી કાર્યવાહી કરવામાં આવશે અને જે પ્રશાસનને લગતી કાર્યવાહી થશે તે તમામ સામાન્ય રહેશે.
લાલુ પટેલે વડાપ્રધાન સમક્ષ CRZ-2ને દમણમાં લાગુ કરવામાં આવે અને દીવને એક ટાપુ તરીકેનો દરજ્જો મળે તેવી રજૂઆત પણ કરી હતી. સાંસદે દમણની ગ્રામ પંચાયતના સરપંચો અને જિલ્લા પંચાયતને વિશેષ અધિકાર આપવા અંગે પણ રજૂઆત કરી હતી. FSIનો ગ્રામીણ વિસ્તારમાં અને અર્ધ શહેરી વિસ્તારમાં વધારો કરવામાં આવે, દમણ-દીવના નાગરિકો અથવા તેમના બાળકો ભૌગોલિકરૂપ અનુસાર અન્ય પ્રદેશમાં જન્મ લે તો તેમનું રજિસ્ટ્રેશન સંઘપ્રદેશમાં કરવામાં આવે તે અંગે પણ વડાપ્રધાન મોદી સમક્ષ રજૂઆત કરી હતી.
અત્રે ઉલ્લેખનીય છે કે, સાંસદ લાલુ પટેલની આ મુલાકાત ખૂબ મહત્વની માનવામાં આવી રહી છે. કેમ કે, એક તરફ દમણ-દીવ અને દાદરા નગર હવેલીને એક જ પ્રશાસન નીચે વિલય કરવામાં આવનાર હોવાથી આ બંને પ્રદેશોમાં વિરોધનો સૂર પણ ઉઠ્યો છે. જે વિરોધના સૂરને ઉગતો જ ડામી દેવામાં આ મુલાકાત ખુબ જ સૂચક મનાઈ રહી છે.
