સેલવાસ : સંઘપ્રદેશમાં નરોલી વિસ્તારમાં આવેલી ભિલોસા કંપનીમાં કોન્ટ્રાકટ પર કામ કરતા કામદારોએ પગારને લઈને અને વતન જવાની જીદને લઈને હોબાળો મચાવ્યો હતો. હાલમા કંપનીમા પ્રોડક્શન બંધ હોવાને કારણે આ લોકોને કામ પર બોલાવવામા નથી આવતા. આ સાથે કામદારોને ગત માસનો પગાર પણ ચૂકવાયો નથી. જ્યાં રહે છે તે રૂમના માલિકો પણ ભાડુ માગી રહ્યા છે.
આ સમગ્ર પરિસ્થિતિમાં કામદારોનું કહેવુ છે કે, અમારી સ્થિતિ એવી છે કે ખાવા માટે પૈસા બચ્યા નથી. ત્રણ દિવસથી રોજના કલેકટર ઓફીસ પર ધક્કા ખાઈ રહ્યા છીએ તેમને રજુઆત કરી છે કે કા તો અમને કામ આપો અથવા તો અમને અમારા વતન જવાની પરમીશન આપો. કલેક્ટરે એવુ જાહેર કરેલું છે કે, કોઈએ પણ અહીથી જવાનુ નથી આપને જે જરૂરી હશે તે સુવિધા આપવામા આવશે. હવે કામદારો જીદ પર ચડયા છે કે અમને ગામ જવાની પરમીશન આપો. તે જ સંદર્ભે ગત રાત્રે 200 જેટલા કામદારો કંપનીના ગેટ આગળ એકઠા થયા હતા. પોલીસે ટોળું એકઠુ થયેલુ જોતા સીધો લાઠી ચાર્જ શરૂ કરી દીધો હતો, ત્યારબાદ કામદારોએ પોલીસ પર પથ્થરમારો શરૂ કરી દીધો હતો. આ સાથે તોડફોડ પણ કરી હતી આ ઉપારાંત એક બાઇકને પણ સળગાવી દીધી હતી. આ ઘટના બાદ પોલીસનો મોટો કાફલો નરોલી પહોંચ્યો હતો અને ટોળા પર કાબૂ મેળવ્યો હતો.
ઉલ્લેખનીય છે કે, સંઘપ્રદેશ દાદરા નગર હવેલી પ્રશાસન એક તરફ લોકડાઉનમાં હજારો શ્રમિકોને વેતન ચૂકવાયું હોવાની ગુલબાંગ પોકારી રહ્યું છે, ત્યારે મંગળ-બુધવારની ઘટના સામે આવ્યા બાદ પ્રશાસનના આ દાવા પોકળ હોવાનું અને કામદારો વતન જશે તો ઉદ્યોગો ઠપ્પ થશે તેવી દહેશત વચ્ચે શ્રમિકોને વતન જતા રોકવા ઝુલ્મ પર ઉતર્યા હોવાની ચર્ચાએ જોર પકડ્યું છે.
