સ્પેશિયલ એબ્લડ ચાઈલ્ડ સાથે ગાયના ચરણરજમાંથી બનાવેલ કલરથી મનવાઈ હોળી

અમદાવાદઃ હોળીનો તહેવાર એટલે રંગ અને હર્ષ ઉલ્લાસનો તહેવાર પરંતુ હોળીના રંગમાં કેમિકલવાળા કલર ભંગ પાડે છે અને હોળીના તહેવાર બાદ અનેક લોકો સ્કિન ઈન્ફેક્શનથી પીડાય છે અને વિવિધ પ્રકારના સ્કિનને લગતા રોગ પણ થાય છે. ત્યારે બીજી તરફ ઈકોફ્રેન્ડલી હોળી માટે હવે જાગૃતિ વધી રહી છે લોકો પર્યાવરણને નુકસાન ન થાય સાથે ત્વચાને નુકસાન ના થાય તે હેતુથી હવે ઓર્ગેનિક કલરથી હોળી મનાવી રહ્યા છે. અમદાવાદમાં સ્પેશિયલ એબ્લડ ચાઈલ્ડ માટે એક વિશિષ્ટ હોળીનું આયોજન કરવામાં આવ્યું હતું.

લાયન્સ ક્લબના સહયોગથી મોટી સંખ્યામાં સ્પેશિયલી એબ્લડ ચાઈલ્ડ તેમના વાલીઓ સાથે આવ્યા હતા જ્યાં ગાયની ચરણરજ અને ગાયનું છાણ અને ઓર્ગેનિક ફૂલોના કલરથી હોળી મનાવવામાં આવી હતી..આયોજક વિજયભાઈ પરસાણા એ જણાવ્યું હતું કે, માનસિક અને શારીરિક અસ્વસ્થ આ બાળકોને ગાયની ચરણરજ અને છાણના ઉપયોગ દ્વારા સ્વસ્થ કરી શકાય છે.