પ્રતિષ્ઠાની પેટા ચૂંટણી: ગઢડા ગ્રામ્ય વિસ્તારોમાં કુંવરજી બાવળિયાનો ઝંઝાવાતી પ્રચાર

3 નવેમ્બરે યોજાનારી ગઢડા વિધાનસભા બેઠકની પેટા ચૂંટણી માટે પ્રચાર કાર્ય પુરજોશમાં ચાલી રહ્યું છે. ગઢડા બેઠક પર ભાજપના ઉમેદવાર આત્મારામ પરમારના સમર્થનમાં ઠેર-ઠેર જનસભાઓ અને બેઠકનો દોર ચાલી રહ્યો છે. જેના અનુસંધાને કુંવરજી બાવળીયાએ પણ ભાજપના ઉમેદવાર આત્મારામ પરમારના સમર્થનમાં પ્રચાર કર્યો હતો.

• ગઢડા વિધાનસભા બેઠકની પેટા ચૂંટણી
• ભાજપના ઉમેદવાર માટે સ્ટાર પ્રચારકો મેદાનમાં
• કુંવરજી બાવળીયાએ કર્યો ઝંઝાવાતી પ્રચાર

ગઢડા/બોટાદ: ગઢડા વિધાનસભા બેઠકની પેટા ચૂંટણી માટે ભાજપના ઉમેદવાર આત્મારામ પરમારના સમર્થનમાં શહેર અને ગ્રામ્ય વિસ્તારોમાં ભાજપના નેતાઓ ચૂંટણી પ્રચારમાં એડીચોટીનું જોર લગાવી રહ્યા છે. નેતાઓ પોતાને જનસમર્થન મળી રહ્યાનો દાવો કરી રહ્યા છે. ગઢડા વિધાનસભાની પેટા ચૂંટણીમાં ભાજપે કેબિનેટ પ્રધાન કુંવરજી બાવળિયાને ઇન્ચાર્જ બનાવ્યા છે. જેને લઈને છેલ્લા એક મહિનાથી કુંવરજી બાવળિયા ગામડે ગામડે ફરીને જનસંપર્ક કરી રહ્યાં છે.

ભાજપના ઉમેદવારને જીતાડવા જનતાને અપીલ

મતદાનને હવે ગણતરીના દિવસો બાકી છે. ત્યારે કુંવરજી બાવળીયા, બોટાદ જિલ્લા કારોબારી ચેરમેન વાલજીભાઇ જાદવ, કોળી સમાજના આગેવાનો અને કાર્યકરો હાજર રહ્યા હતા અને ગામડે ગામડે સભાઓ અને બેઠકો કરી હતી. જેમાં ભાજપના ઉમેદવાર આત્મારામ પરમારને જંગી બહુમતીથી જીતાડવા લોકોને અપીલ કરવામાં આવ હતી.