પ્રજા રામ ભરોસેઃ રાજ્યના 4 મહાનગરમાં કરફ્યૂ, તો બોટાદમાં ઉર્જા પ્રધાનનો સ્નેહમિલન કાર્યક્રમ

બોટાદ સર્કીટ હાઉસમાં ઉર્જા પ્રધાન સૌરભ પટેલનો સ્નેહમિલન કાર્યક્રમ યોજાયો હતો. આ સ્નેહમિલન કાર્યક્રમમાં કોરોનાના ગાઈડલાઈનના ધજાગરા ઉડ્યા હતા. એક તરફ રાજ્યમાં કોરોનાના કેસ વધતાં અમદાવાદ, રાજકોટ, સુરત અને વડોદરામાં રાત્રી કરફ્યૂ લગાવવામાં આવ્યો છે. બીજી તરફ આ પ્રકારના સ્નેહ મિલનના કાર્યક્રમો દ્વારા કોરોનાના નિયમોના ધજાગરા ઉડી રહ્યા છે. જેથી કોરોનાના કેસ વધવાની સંભાવનોઓ છે, આમ છતાં કાયદો માત્ર લોકો માટે જ છે, નેતાઓેને કાયદો લાગુ ના પડતો હોય તેમ જોવા મળી રહ્યું છે. આ કાર્યક્રમમાં સૌરભ પટેલે જણાવ્યું હતું કે, આવા કાર્યક્રમો તો ચાલુ જ રહેશે, લોકોએ જાતેજ નિયમોનું પાલન કરવું જોઈએ.

• બોટાદમાં ઉર્જા પ્રધાન સૌરભ પટેલનો સ્નેહમિલન કાર્યક્રમ યોજાયો
• કાર્યક્રમમાં સોશિયલ ડિસ્ન્ટન્સના ઉડ્યા ધજાગરા
• ભાજપના આગેવાનો સહિત અનેક કાર્યકર્તાઓ રહ્યા ઉપસ્થિત

બોટાદઃ રાજ્યમાં દિવસેને દિવસે કોરોનાના કેસમાં સતત વધારો થઈ રહ્યો છે. ખાસ કરીને પેટા ચૂંટણી અને દિવાળીના તહેવારો બાદ ફરી પાછા કોરોના પોઝિટિવ કેસમાં વધારો જોવા મળ્યો છે. ત્યારે કોરોનાને કાબુમાં લેવા રાજ્યના ચાર મહાનગરોમાં રાત્રી કરફ્યૂં પણ લગાવવામાં આવ્યું છે.

કોરોનાની ગાઈડલાઈન્સનો થયો ભંગ

એક બાજુ રાજ્ય સરકાર કોરોનાને લઈ કરફ્યૂ લગાવી રહી છે. ત્યારે બીજી તરફ રવિવારે બોટાદ સર્કીટ હાઉસના કમ્પાઉન્ડમાં ધારાસભ્ય સૌરભ પટેલનો સ્નેહ મિલન કાર્યક્રમ યોજાયો હતો. જેમાં બોટાદ જિલ્લા ભાજપ પ્રમુખ ભીખુભા વાઘેલા, માર્કેટિંગ યાર્ડના ચેરમેન જોરુ ધાધલ સહિત ભાજપના આગેવાનો હાજર રહ્યા હતા. આ સ્નેહ મિલન કાર્યક્રમ દરમિયાન કોરોનાની ગાઈડલાઈન્સનો ભંગ જોવા મળ્યો હતો.

આમ જ રાજકીય મેળાવડા થશે તો કોરોના કાબૂમાં કેવી રીતે આવશે?

ભાજપના આગેવાનો, હોદેદારો અને કાર્યકતાઓ જ કોરોનાની ગાઈડલાઈનનું પાલન નથી કરતા, ત્યારે જો આવી જ રીતે રાજકીય મેળાવડા થશે તો કોરોના કાબૂમાં કેવી રીતે આવશે? કાર્યક્રમમાં જો આમ જ કોરોનાના નિયમોનું ઉલ્લંઘન થતું રહેશે તો આવનારા દિવસોમાં રાજ્યમાં કોરોનાના કેસમાં હજૂ પણ વધારો થવાની શક્યતા છે, ત્યારે આ બાબતે સૌરભ પટેલે જણાવ્યું હતું કે, કોરોના મહામારીમાં પણ આ પ્રમાણે કાર્યક્રમો તો ચાલુ જ રહેશે, લોકોએ જાતે જ નિયમોનું પાલન કરવું જોઈશે.