ભાવનગરમાં પાણીના ખાડામાં પડતા યુવકનું મોત

ભાવનગરઃ શહેરના જશોનાથ સર્કલમાં આવેલા પાણીના ખાડામાં અકસ્માતે પડી ગયેલા યુવાનનું મોત નીપજ્યું હતું. ભાવનગરના ફાયર કાફલાએ અંદાજે દોઢ કલાકની જહેમત બાદ મૃતદેહને બહાર કાઢ્યો હતો.

ભાવનગર શહેરના મધ્યમાં આવેલા જશોનાથ સર્કલમાં ગાર્ડન માટે ભાવનગર મહાનગર પાલિકા દ્વારા વિશાળ પાણીનો ટાંકો બનાવવામાં આવ્યો છે. આ ટાંકામાં એક યુવાન પડ્યો હોવાની વિગત મળતા ભાવનગર ફાયર બ્રિગેડનો કાફલો ઘટનાસ્થળે દોડી ગયો હતો અને પાણીમાં ગરકાવ યુવાનની શોધખોળ હાથ ધરી હતી.

કાફલાએ અંદાજે દોઢ કલાકની જહેમત બાદ યુવાનનો મૃતદેહ શોધી કાઢ્યો હતો અને પોસ્ટમોર્ટમ અર્થે ભાવનગરની સર ટી હોસ્પિટલ ખાતે ખસેડ્યો હતો. પોલીસની પ્રાથમિક તપાસમાં મૃતક યુવાનનું નામ પ્રકાશ હોવાનું અને બપોરના સમયે ગરમી લાગવાના કારણે નાવા માટે પાણીના ટાંકામાં પડ્યા બાદ લાપતા થઈ હોવા ગયો હોવાનું જાણવા મળ્યું હતું.