રસાલા કેમ્પમાં આવેલા કોરોના પોઝિટિવ કેસને પગલે કેમ્પ કન્ટેન્ટમેન્ટ ઝોનમાં ફેરવાયો

ભાવનગરના સિંધી સમાજનું મોટું રહેણાંક રસાલા કેમ્પમાં છે, ત્યારે રસાલા કેમ્પમાં આશરે એક સાથે આવેલા 11 કેસને પગલે રસાલા કેમ્પનો મોટાભાગનો વિસ્તાર કન્ટેન્ટમેન્ટ ઝોનમાં ફેરવાયો છે અને આરોગ્યની ટીમોના ઘાડેધાડા ઉતારી ઘરે ઘરે તપાસ મનપા દ્વારા કરવામાં આવી છે.

ભાવનગર: શહેરમાં સંતકવરરામ ચોક નજીક આવેલા રસાલા કેમ્પ સિન્ધુનગરમાં આવેલા આશરે 11 જેટલા કેસને પગલે મહાનગરપાલિકા તંત્રમાં દોડધામ મચી છે. રસાલા કેમ્પમાં રહેતા સિંધી સમાજના લોકોમાં ભયનો માહોલ સર્જાઈ ગયો છે. એક સાથે આવેલા 11 કેસને પગલે સંક્રમણ વધવાની પુરી શક્યતાઓ ઉભી થાય છે. આવી સ્થિતિમાં મનપા દ્વારા મોટાભાગના રસાલા કેમ્પ વિસ્તારમાં લોખંડના પતરા લગાવી દેવામાં આવ્યા છે. શહેરની વચ્ચે આવેલા રસાલા કેમ્પ સામે DSP અને IGની કચેરી પણ આવેલી છે, ત્યારે રસાલા કેમ્પને કન્ટેન્ટમેન્ટ ઝોનમાં ફેરવી દેવાયો છે.

શહેરના રસાલા કેમ્પમાં આવેલા વધુ કેસ અને એક જ સમાજ હોવાને પગલે તંત્ર ચિંતિત છે. મનપા દ્વારા આરોગ્યની ખાસ ટીમોના ઘાડેધાડા ઉતારી દીધા છે. મનપાના આરોગ્યની અલગ અલગ ટીમ બનાવીને ઘરે ઘરે તપાસ શરૂ કરી દીધી છે. ઘરે ઘરમાં એક-એક વ્યકતિની આરોગ્ય ચકાસણી શરૂ કરવામાં આવી છે. જેમાં નાના મોટા સૌ કોઈની તપાસ કરવામાં આવી રહી છે. આરોગ્યની ટીમ હવે અહીંયા રોજ દરેક ઘરના વ્યક્તિની જાણકારી અને સ્વાસ્થ્યને લઈને કાળજી રાખશે કોઈ શંકાસ્પદ લાગે તો તુરંત તેને સારવાર આપવાનો પ્રારંભ કરી દીધો છે. આ સાથે આરોગ્યની ટીમ ખાસ દવાઓ સાથે માર્ગદર્શન પણ આપી રહી છે.

કન્ટેન્ટમેન્ટ ઝોન