ભાવનગર : સમગ્ર રાજ્યમાં આધારકાર્ડ ધારકોને લાલચ આપીને તેમના મોબાઈલ નંબર બદલી બોગસ પેઢીઓ બનાવીને સરકાર સાથે ઉચાપત મામલે બે ફરિયાદ બાદ SITની રચના કરાય છે. ત્યારે રાજ્યના DGPએ SITની રચના બાદ ટીમે વધુ બે શખ્સોને ઝડપી લીધા છે. SITની રચના બાદ બોગસ પેઢી બનાવી બોગસ બીલિંગ કેસોમાં આરોપીઓની લંગર લાગવાની શક્યતાઓ પ્રાથમિક દેખાય છે.
શું છે સમગ્ર મામલો : ભાવનગરના પાલીતાણામાં પહેલી નોંધાયેલી ફરિયાદ બાદ બોગસ બીલિંગ કૌભાંડ સામે આવ્યું હતું. જોકે, બીજી ફરિયાદ ભાવનગર નિલમબાગ પોલીસ સ્ટેશનમાં થઈ હતી. આધારકાર્ડ ધારકોને અંધારામાં રાખીને તેમના આધારકાર્ડમાં મોબાઈલ નંબર બદલી બોગસ પેઢી બનાવવાનો કૌભાંડનો પર્દાફાશ થયો છે. રાજ્યના ડીજીપીએ આધારકાર્ડ મામલે SITની રચના કરીને તપાસ સોપતા વધુ બે શખ્સો ઝડપાયા છે.
પહેલી અને બીજી ફરિયાદ અને કલમો : ભાવનગર જિલ્લાના પાલીતાણામાં સૌપ્રથમ બોગસ બીલીંગ મામલે બોગસ પેઢીઓ બનતી હોવાની ફરિયાદ નોંધાવાઈ હતી. પાલીતાણા ટાઉન પોલીસ સ્ટેશનમાં 406,420, 465, 467, 468, 471 અને 34 મુજબ ફરિયાદ નોંધાયા બાદ ભાવનગર IG કક્ષાએથી તપાસ શરૂ થઈ હતી. ભાવનગર સાયબર સેલને તપાસ સોંપતા હાલ સુધીમાં 11 જેટલા શખ્સો બોગસ પેઢી બનાવીને સરકાર સાથે ઉચાપત કરતા હોય લોકોને છેતરતા હોવાનું સામે આવ્યું હતું. જોકે એ જ રીતે નીલમબાગ પોલીસ સ્ટેશનમાં પણ ફરિયાદ નોંધાતા ત્રણ શખ્સો ઝડપાઈ ગયા હતા. પાલીતાણામાં પ્રથમ ફરિયાદ જાગૃત નાગરિકે નોંધાવ્યા બાદ કૌભાંડ ખુલવાની શરૂઆત થઈ હતી.
કઈ રીતે આધારકાર્ડ ધારકોને લૂંટતા હતા : ભાવનગરમાં પકડાયેલા આરોપીઓ આધારકાર્ડ ધારકોને 1,000ની લાલચ આપીને આધારકાર્ડ સેન્ટર સુધી લાવવામાં આવતા હતા. જ્યાં આધારકાર્ડ ધારકને અંધારામાં રાખીને મોબાઈલ નંબર બદલી લેવામાં આવતો હતો. આધારકાર્ડના ધારકોને તેના બદલામાં 1000 જેવી કિંમત આપવામાં આવતી હતી. જોકે આ સરકારી યોજના હોવાનું જણાવીને બોગસ પેઢી આરોપીઓ બનાવતા હતા. અશિક્ષિત અને પૈસાની જરૂરિયાત વાળા આધારકાર્ડ ધારકોને નિશાન બનાવીને છેતરતા હતા.
આ પણ વાંચો : Fake PMO Officer: ઠગ કિરણ પટેલે બોલવાની છટાથી અરવલ્લીના ખેડૂતોને ફસાવ્યા, 1.25 કરોડની છેતરપિંડી
DGP ગુજરાતે SITનું નિર્માણ કર્યું : દેશના આધારકાર્ડમાં છેતરપિંડીથી સરકાર અને પોલીસ બંને ચોકી ગઈ છે. અતિગુપ્ત રહેતી વ્યવસ્થામાં છીંડું કેવી રીતે પડ્યું આ પ્રશ્નનો જવાબ પોલીસને નોંધાયેલી ફરિયાદ બાદ મળ્યો છે. સરકાર પાસેથી આધારકાર્ડ સેન્ટરની ડીલરશિપ લેનાર એજન્સીમાં કામ કરતા લોકો સંડોવાયેલા હોવાનું ખુલ્યું હતું. આધારકાર્ડ ધારકોને છેતરીને બોગસ બીલિંગ કરવામાં આવતો હોવાનો પર્દાફાશ ધીરે ધીરે થઈ રહ્યો છે. જોકે રાજ્યના DGPએ ઘટનાને ગંભીર ગણીને SITની રચના કરી છે. SITમાં મુખ્ય વડા ભાવનગરના IG ગૌતમ પરમાર તેમજ ટીમના સભ્યોમાં ACP જીતેન્દ્ર અગ્રવાલ, ACP શિવમ વર્મા અને DYSP રાધિકા ભારાઈ જોડાયા બાદ SIT દ્વારા તપાસ શરૂ કરવામાં આવી છે.
આ પણ વાંચો : Ahmedabad Crime : એસ્ટ્રલ કંપની સાથે ઠગાઈ આચરનાર પિતા પુત્રની જુગલજોડી ઝડપાય
SITએ વધુ બે શખ્સોને ઝડપી લીધા : આધારકાર્ડનો ગેર ઉપયોગ કરીને બોગસ પેઢી બનાવી બોગસ બીલિંગ કરતી ટોળકી ધીરે ધીરે ઝડપાઈ રહી છે. પાલીતાણા નોંધાયેલી ફરિયાદમાં 11 શખ્સો અને નિલમબાગ પોલીસ સ્ટેશનના ગુનામાં ત્રણ શખ્સો બાદ SITની ટીમ દ્વારા તપાસ કરતા વધુ બે શખ્સો ઝડપાયા છે. જેમાં વરતેજનો રહેવાસી અને એકાઉન્ટિંગ તેમજ ભંગાર લે વેચનો વ્યવસાય કરતો 29 વર્ષીય જુનેદ રફીકભાઈ ગોગદા તેમજ વેપાર કરતાં ભાવનગરના ભીલવાડા સર્કલ રહેવાસી ઈસ્માઈલ ઈબ્રાહીમ તેલીયા 24 વર્ષીય ઝડપાઈ છે. SIT દ્વારા ભાવનગર કોર્ટમાં રજૂ કરવામાં આવ્યા હતા. જોકે SITની રચના બાદ પોલીસ વર્તુળમાંથી જાણવા મળતા મુજબ આધારકાર્ડમાં આધારકાર્ડ ધારકોને છેતરીને બોગસ પેઢી બનાવવાનો સિલસિલામાં આરોપીઓની લાંબી લંગર લાગે તો નવાઈ નહીં.
