પાલનપુરઃ બનાસકાંઠા સહિત સમગ્ર દેશભરમાં કોરોના વાઈરસના કેસો દિવસેને દિવસે વધી રહ્યા છે, તેને નાથવા માટે આરોગ્ય વિભાગથી લઈ કેન્દ્ર સરકાર દ્વારા પ્રયાસ હાથ ધરવામાં આવી રહ્યાં છે. મુખ્યપ્રધાન અને વડાપ્રધાન પણ લોકોને સોશિયલ ડિસ્ટન્સ રાખવા અને માસ્ક પહેરવા માટે વારંવાર વિનંતી કરી રહ્યા છે. તેમ છતાં પણ બનાસકાંઠાના નેતાઓ સોશિયલ ડિસ્ટન્સના ધજાગરા ઉડાડતા નજરે પડી રહ્યા છે.
ડીસાના ધારાસભ્ય શશીકાંત પંડયા કોરોના મહામારી વચ્ચે પણ ઘોડા પર બેસી વરઘોડો કાઢી રોડનું ખાતમુહૂર્ત કર્યા બાદ વાવના ધારાસભ્ય ગેનીબેન ઠાકોરે પણ બાધા પુરી કરવા માટે માસ્ક વગર શોભાયાત્રા કાઢી મંદિરમાં પહોંચી સોશિયલ ડિસ્ટન્સનો ભંગ કર્યો હોવાનો વીડિયો વાયરલ થયો છે. આટલું ઓછું હોય તેમ કાંકરેજના ધારાસભ્ય શિવાભાઈ ભુરિયાએ પણ પોતાની શાળાની અંદર બ્લડ ડોનેશન કેમ્પમાં લોકોના ટોળા વચ્ચે માસ્ક અને સોશિયલ ડિસ્ટન્સનો ભંગ કરતા નજરે પડ્યા છે.
આ પણ વાંચો ડીસાના ધારાસભ્ય શશીકાંત પંડ્યા અને કિંજલ દવેના કોરોના વરઘોડાને લઇને લોકોની પ્રતિક્રિયા
ધારાસભ્ય તો ઠીક પરંતુ સોશિયલ ડિસ્ટન્સનો ભંગ કરવામાં હવે બનાસકાંઠા જિલ્લાના સાંસદ પણ પાછળ રહ્યા નથી. તેઓએ પણ સરકારના કૃષિ બિલ અંગે ખેડૂતોને સમજાવવા માટે થરાદના ભાપડી ગામે પહોંચ્યા હતા. ત્યાં 200 ખેડૂતો વચ્ચે તેઓ પણ માસ્ક વગર નજરે પડતાં આ વિવાદ વધુ વકર્યો છે. એક તરફ સામાન્ય નાગરિક સરકારી ગાઈડલાઈનનો ભંગ કરે તો તેને તરત જ દંડ ફટકારવામાં આવે છે ત્યારે બીજી તરફ નેતાઓ ખુલ્લેઆમ સરકારી નિયમોનો ધજાગરા ઉડાડ્યા બાદ પણ તંત્ર ચૂપ રહેતા લોકોમાં રોષ ભભૂકી ઉઠયો છે. આવા નેતાઓ સામે કડક કાર્યવાહીની માંગ ઉઠી રહી છે.
