ઉત્તરાયણને લઇ લોકો સવારથી જ અગાસી પર ચડી પતંગ ચગાવતા હોય છે. પરંતુ વહેલી સવારે પક્ષીઓ આકાશમાં વિહાર કરતા હોય છે. તે સમય દરમિયાન પક્ષીઓ પતંગની દોરીના સંપર્કમાં આવતા તેમની પાંખ અને શરીરના ભાગે ગંભીર ઈજાઓ થાય છે. ઉત્તરાયણ નિમિત્તે ઘાયલ થતાં પક્ષીઓને બચાવવા માટે અનેક સેવાભાવી સંસ્થાઓ સહીત સરકારી તંત્ર પણ કામે લાગ્યું છે.
બનાસકાંઠા જિલ્લાના ડીસામાં સેવાભાવી સંસ્થાઓ સાથે મળી સરકારી તંત્ર દ્વારા પક્ષીઓને બચાવવા માટેના પ્રયત્નો કરવામાં આવી રહ્યા છે. જેમાં ઉતરાયણ અને ઉતરાયણના બીજા દિવસે 120 જેટલા ઘાયલ પક્ષીઓ સારવાર માટે આવ્યા હતા. જેમાંથી 27 જેટલા પક્ષીઓ મોતને ભેટયા હતા. આ તમામ પક્ષીઓને ડીસા ફોરેસ્ટ ઓફિસ ખાતે દફનવિધિ કરવામાં આવી હતી.
પતંગ ચગાવવાનો યુવાનોમાં ભારે ઉત્સાહ હોય છે. પરંતુ અનેક યુવાનોએ ઉત્તરાયણ ન મનાવી ઘાયલ પક્ષીઓની સેવા કરી હતી. ઉતરાયણના દિવસથી બીજા દિવસ સુધી તમામ પક્ષીઓને સારવાર આપી હતી. ત્યારે આ અંગે ડીસા ફોરેસ્ટ વિભાગના અધિકારીએ જણાવ્યું હતું કે, ગુજરાત સરકાર દ્વારા ઉતરાયણ પહેલા પક્ષી બચાવો માટે અનેકવિધ જાહેરાતો બહાર પાડવામાં આવે છે. લોકોએ પોતાની જાતે જ સવારે અને સાંજે પતંગ ચગાવી આ પક્ષીઓને બચાવવા માટેની કામગીરી કરવી જોઈએ. જેના કારણે અબોલ પક્ષીઓની જિંદગી બચી શકે તેમ છે. ત્યારે ડીસા ખાતે 127 જેટલા પક્ષીઓને સારવાર આપી તેમને નવું જીવન દાન આપવામાં આવ્યું હતું. જ્યારે 27 જેટલા અબોલ પક્ષીઓનું મૃત્યુ થતા તેમની દફનવિધિ કરવામાં આવી હતી.
