બનાસકાંઠા : સમગ્ર દેશમાં વૈશ્વિક મહામારી કોરોના વાઈરસને ફેલાતો અટકાવવા માટે બીજા તબક્કાનું લોકડાઉન ચાલી રહ્યું છે. અને દરેક લોકોને જ્યાં હોય ત્યાં જ રહેવાની અપીલ કરવામાં આવી છે. તેમ છતાં પણ કેટલાક પરપ્રાંતિય લોકો પોતાના વતન જવા માટે અવનવા નુસખા અપનાવતા હોય છે.
બનાસકાંઠાની અમીરગઢ બોર્ડર પરથી પણ કન્ટેનરમાં છુપાઈને જતા 102 લોકોને પોલીસે ઝડપી પાડયા છે. મોરબીથી રાજસ્થાનના અલવર તરફ જઈ રહેલું કન્ટેનર અમીરગઢ બોર્ડર પર આવતા જ પોલીસને શંકા ગઈ હતી. જેથી બોર્ડર પર રહેલી પોલીસે આ કન્ટેનર થોભાવીને તપાસ કરતા તેમાંથી 21 બાળકો સહિત કુલ 102 લોકો સંતાયેલા મળી આવ્યા હતા. જો કે, કન્ટેનર થોભાવતા જ કંડકટર અને ડ્રાઇવર પોલીસને જોઈ ફરાર થઈ ગયા હતા. અમીરગઢ પોલીસે આ કન્ટેનર જપ્ત કર્યું છે.
કન્ટેનરમાં છુપાઈને પોતાના વતન જઈ રહેલા 102 લોકોની આરોગ્યની તપાસ કરી અંબાજીના શેલ્ટર હોમ ખાતે કોરોન્ટાઇન કર્યા છે. તેમજ કન્ટેનરના ચાલક અને કંડક્ટર સામે ગુન્હો નોંધી વધુ તપાસ હાથ ધરી છે.
