પાલનપુરમાં બે ખાનગી હોસ્પિટલમાં આરોગ્ય વિભાગના દરોડા, સોનોગ્રાફી મશીન સીલ કરાયા

બનાસકાંઠાના પાલનપુરની ખાનગી હોસ્પિટલોમાં આજે શુક્રવારના રોજ આરોગ્ય વિભાગે દરોડા પાડયા હતા. અને બે ખાનગી હોસ્પિટલોમાં અનિયમિતતા અને ક્ષતિઓ જણાતા 2 સોનોગ્રાફી મશીન સીલ કરાયા હતા. આરોગ્ય વિભાગના અચાનક દરોડાથી અન્ય ખાનગી તબીબોમાં ફફડાટ વ્યાપી ગયો હતો.

• પાલનપુરમાં બે ખાનગી હોસ્પિટલમાં આરોગ્ય વિભાગના દરોડા
• અનિયમિતતા અને ક્ષતિઓ જણાતા 2 સોનોગ્રાફી મશીન સીલ કરાયા
• હોસ્પિટલના તબીબો સામે કડક કાર્યવાહી થશે
• આરોગ્ય વિભાગની કડક કાર્યવાહીથી અન્ય ડૉક્ટરોમાં ફફડાટ

બનાસકાંઠાઃ જિલ્લામાં છેલ્લા ઘણા સમયથી ખાનગી હોસ્પિટલોમાં સોનોગ્રાફી મશીનના ઉપયોગ બાબતે અનેક ફરિયાદો ઉઠી હતી. જેને પગલે આજે શુક્રવારના રોજ જિલ્લા આરોગ્ય અધિકારી ડો. મનીષ ફેન્સી અને તેમની ટીમે પાલનપુરની બે ખાનગી હોસ્પિટલમાં દરોડા પાડયા હતા. ન્યુ મહેશ્વરી અને પૃથ્વી હોસ્પિટલ નામની બે હોસ્પિટલોમાં સોનોગ્રાફી મશીનની કામગીરીની તપાસ કરતા અનિયમિતતા અને ક્ષતિઓ જણાઈ હતી. બંને હોસ્પિટલના તબીબો સોનોગ્રાફી માટે ફોર્મ એફ ભર્યું નહોતું તેમજ સોનોગ્રાફી માટેની પાવતી કે રજીસ્ટર પણ નિભાવ્યું ન હતું. જેથી આરોગ્ય વિભાગે આ બંને હોસ્પિટલમાં સોનોગ્રાફી મશીન સીલ કર્યા હતા. તેમજ હોસ્પિટલના સંચાલક ડૉ.દર્શન કેલા અને ડૉ. પ્રકાશ દેસાઇને આ મામલે નોટિસ ફટકારી આગળની કાર્યવાહી હાથ ધરી હતી.

હોસ્પિટલના તબીબો સામે કડક કાર્યવાહી

અગાઉ પણ બનાસકાંઠા જિલ્લામાં આરોગ્ય વિભાગે ગર્ભ પરીક્ષણ કરતા તબીબ સમે કાર્યવાહી કરી ફરિયાદ કરેલી છે. તેમ છેતા કેટલાક તબીબો હજુ પણ સુધરતા નથી. જેથી ગાયનેક હોસ્પિટલમાં અચાનક દરોડા પાડવામાં આવી રહ્યા છે. આરોગ્ય વિભાગની તબીબો સામે કડક કાર્યવાહીથી અન્ય ખાનગી હોસ્પિટલના તબીબોમાં પણ ફફડાટ વ્યાપી ગયો હતો.

આરોગ્ય વિભાગની કડક કાર્યવાહીથી અન્ય ડૉક્ટરોમાં ફફડાટ

બનાસકાંઠા જિલ્લામાં છેલ્લા ઘણા સમયથી ડૉક્ટરો દ્વારા ગેરકાયદેસર સોનોગ્રાફી મશીન ચલાવતા હોવાની ફરિયાદો જિલ્લા આરોગ્ય અધિકારીને મળતી હતી. જે આધારે જિલ્લા આરોગ્ય અધિકારી દ્વારા એક જ વર્ષમાં અનેક હોસ્પિટલોમાં ગેરકાયદેસર સોનોગ્રાફી મશીન શીલ કરવામાં આવ્યા છે. ત્યારે બનાસકાંઠા જિલ્લામાં જિલ્લા આરોગ્ય અધિકારીની કડક કાર્યવાહી હાલમાં અન્ય સોનોગ્રાફીના મશીન ચલાવતા ડૉક્ટરોમાં ફફડાટ જોવા મળી રહ્યો છે.

ત્યારે હવે જોવાનું એ રહ્યું કે બનાસકાંઠા જિલ્લામાં મોટાભાગે રાજસ્થાનથી ગરીબ દર્દીઓ પોતાની સારવાર કરવા માટે આવતા હોય છે પરંતુ મોટા ભાગના ડૉક્ટરો રાજસ્થાનથી આવતા દર્દીઓને અવારનવાર સોનોગ્રાફી મશીન દ્વારા ગેરકાયદેસર સારવાર કરવામાં આવે છે. ત્યારે આવા ડૉક્ટરો સામે પણ કડક કાર્યવાહી કરવામાં આવે તો આગામી સમયમાં વારંવાર સોનોગ્રાફી મશીનની ફરિયાદો બંધ થઈ શકે તેમ છે.