ગઈકાલે ઈદનો ચાંદ દેખાતા જ મુસ્લિમ બિરાદરોના પવિત્ર રમઝાન માસની પૂર્ણાહૂતિ થઈ હતી અને ઈદની ઉજવણી શરૂ થઈ હતી. જેમાં ડીસાની ગવાડી ખાતે આવેલી પ્રસિદ્ધ ઈદગાહ ખાતે સવારથી જ અબાલ વૃદ્ધથી માંડી નાના બાળકો નવા વસ્ત્રોમાં સજ્જ થઈ ઈદની વિશેષ નમાઝ અદા કરી હતી. સૌ કોઈએ એકબીજાને ગળે ભેટી ઈદની મુબારક બાદ પાઠવી હતી.
બનાસકાંઠામાં મુસ્લિમ બિરાદરોએ કરી ઈદની ઉજવણી
એકબીજાના ઘરે જઈ મુસ્લિમ બિરાદરોએ અરસ-પરસ ઈદની શુભેચ્છા પાઠવી હતી. તેમજ સૌ કોઈએ ખીર-ખુરજા ખવડાવી મહેમાનોનું સ્વાગત કર્યું હતુ. મુસ્લિમ બિરાદરોએ ઈદગાહમાં નમાજ અદા કરી પોતાના પૂર્વજોને યાદ કર્યા હતા અને કબ્રસ્તાનમાં પહોંચી પુષ્પાજંલિ અર્પી તેમના માટે પરિવારના વડીલોને જન્નતમાં રાખી, ખુશહાલ બનાવે તેવી ઈબાદત કરી હતી. આમ, તમામ મુસ્લિમ બંધુઓ માટે આજે ખુશી અને ઉંમગ સહિત પ્રેમ અને ભાઈચારાનો અનોખો પર્વ ઉજવાઈ રહ્યો છે.
