અરવલ્લી : જિલ્લા કલેકટર અમૃતેશ ઔરંગાબાદકરે જણાવ્યું હતું કે, લોકડાઉન જાહેર થયેથી છેલ્લા પચાસ દિવસથી રાજસ્થાન, ઉત્તરપ્રદેશ, મધ્યપ્રદેશ એમ વિવિધ રાજ્યના લોકો અરવલ્લી જિલ્લામાં આશ્રય લઇ રહ્યા હતા. જેમાં કેન્દ્ર સરકાર દ્વારા તેમને વતન જવાની છૂટ આપવમાં આવતા મધ્યપ્રદેશ અને રાજસ્થાનના લોકોને તેમના વતન મોકલી આપવામાં આવ્યા હતા, એવા જ ઉત્તરપ્રદેશ રાજયના 1039 લોકો અરવલ્લી જિલ્લામાં ધંધાર્થે રોકાયેલા હતા. આ પરપ્રાંતિયો પોતાના વતનમાં જવાની ઇચ્છા દર્શાવતા શ્રમિક સ્પેશ્યલ ટ્રેનની સુવિધા મારફતે તેમના વતન મોકલવાની વ્યવસ્થા કરાઇ છે.
અરવલ્લી જિલ્લામાંથી શ્રમિક લોકોને વતન મોકલાયા અરવલ્લી જિલ્લામાં આશ્રય લઇ જેમાં ઉતરપ્રદેશના 1039 આશ્રિતોને આરોગ્ય ચકાસણી, ફ્રૂડ પેકેટ તથા પાણી સહિત તમામ સુવિધાઓ ઉપલબ્ધ કરાવી તેમને બસ દ્વારા ગુજરાતની સરહદ સુધી પહોચાડવાની વ્યવસ્થા કરાઇ હતી. જેમાં મોડાસા ગ્રામ્યના 380 લોકોને 13 એસ.ટી બસ, મોડાસા નગરપાલિકા વિસ્તારના 170 લોકોને 06 બસ, બાયડ તાલકા મથકથી 87 લોકોને 03 બસ, ધનસુરા તાલુકા મથકથી 70 માણસોને 02 બસ, માલપુર તાલુકા મથકથી 105 માણસોને 03 બસ મેઘરજથી 188 માણસોને 06 બસ જયારે ભિલોડા તાલુકા મથકથી 39 માણસોને 01 બસ મળી કુલ 1039 માણસોને 34 બસોમાં બેસાડી બનાસકાંઠા જિલ્લાના પાલનપુર રેલવે સ્ટેશન સુધી મુકી આપવામાં આવ્યા હતા. જયાંથી ટ્રેન મારફતે પોતાના વતનમાં પરત ફરશે.જો કે, શ્રમિકોનો સંપર્ક કરતા તેમણે જણાવ્યુ હતું કે, તેમની પાસેથી 700 રૂપિયા ભાડુ વસુલ કરવામાં આવ્યુ છે.આ અંગે અરવલ્લી જિલ્લા કોંગેસ અધ્યક્ષ કમલેન્દ્રસિંહ પુવારે આક્ષેપ કર્યો હતો કે, કોંગ્રેસ પક્ષે અરવલ્લી જિલ્લા વહિવટી તંત્ર પાસેથી શ્રમિકોની યાદી માંગી ભાડું ચુકવવાની તૈયારી દર્શાવી હતી. તેમ છતાં તેમને યાદી આપવમાં આવી ન હતી. શ્રમિકોના ભાડા અંગેનો વિવાદ સમગ્ર દેશમાં ચાલી રહ્યો છે. ત્યાં અરવલ્લીમાં પણ આ અંગે રાજકીય વાતવારણ ગરમાયુ હતુ.
