ભિલોડા: આ મામલામાં શામળાજી પોલીસની જીપ અને કર્મચારી પર ટોળાએ પથ્થરમારો કર્યો હતો. જેમાં એક કર્મચારી ઈજાગ્રસ્ત થયો હતો. ટોળાએ પોલીસકર્મીઓને બિભસ્ત ગાળો આપી જાન મારી નાખવાની ધમકી આપી હતી. પોલીસ પર હુમલો થતા જિલ્લાની પોલીસ ઘટના સ્થળે પહોંચીને અસામાજિક તત્ત્વોની ધરપકડ કરવાની કાર્યવાહી હાથ ધરી હતી. શામળાજી પોલીસે 6 શખ્સ, 2 મહિલાઓ અને ટોળા સામે રાયોટિંગનો ગુનો નોંધ્યો હતો.
શામળાજી નજીક આવેલા ગોઢઅઢેરા ગામે અર્જુન શીવા ક્લાસવાના ખેતરમાં ગામના અન્ય શખ્સે ખેતરમાં ટ્રેકટર હંકારતા અર્જુને ઠપકો આપતા સામાન્ય બોલાચાલી થઇ હતી. જે બાદ 50 થી વધુ લોકોએ એક સંપ થઈ ગેરકાયદેસર મંડળી રચી અર્જુન ક્લાસવાના ઘરે પહોંચી પથ્થર અને લાકડીઓ વડે હુમલો કર્યો હતો.
આ હુમલામાં વાહનોમાં તોડફોડ કરતા જૂથ અથડામણની સ્થિતિ પેદા થતા અર્જુને ક્લાસવાએ પોલીસને ફોન કર્યો હતો. જેથી શામળાજી પોલીસ તાબડતોડ ઘટનાસ્થળે પહોંચી હતી. જો કે, ઉશ્કેરાયેલા ટોળાએ શામળાજી પોલીસ જીપ પર પથ્થરો વડે હુમલો કર્યો હતો. ટોળાએ પથ્થરના છુટા ઘા કરતા મહેશ ઉદા નામના પોલીસ કર્મચારીને જમણા ગાલ પર ઈજાઓ પહોંચી હતી. જેથી સારવાર અર્થે દવાખાને ખસેડાયા હતા.
શામળાજી પોલીસે 50થી 60 માણસોના ટોળા સામે IPC કલમની નોંધી ગુનો નોંધી કાયદેસરની કાર્યવાહી હાથ ધરી હતી.
